Агентии омори назди Президенти Ҷумҳурии Тоҷикистон хабар дод, ки тибқи ҳисобҳои пешакӣ, бо назардошти шумораи таваллудшудагон, фавтидагон ва равандҳои муҳоҷирати аҳолӣ, то 1-уми июли соли 2026 шумораи аҳолии Ҷумҳурии Тоҷикистон ба 10 миллиону 817,7 ҳазор нафар расид. 

Манбаъ навиштааст, ки ин нишондиҳанда нисбат ба ҳамин давраи соли гузашта 2 фоиз зиёд аст. 

Гуфта мешавад, ки аз рӯйи шумораи аҳолӣ вилояти Хатлон дар ҷойи аввал қарор дошта, дар давраи ҳисоботӣ дар ин минтақа 3 миллиону 919,2 ҳазор нафар зиндагӣ мекунанд. 

Тибқи иттилои манбаъ, вилояти Суғд аз рӯи шумораи аҳолӣ мавқеи дуюмро ишғол намуда, шумораи аҳолии он ба 3 миллиону 35,8 ҳазор нафар расидааст. 

Дар ноҳияҳои тобеи ҷумҳурӣ шумораи аҳолӣ 2 миллиону 325,1 ҳазор нафарро ташкил медиҳад. 

Дар шаҳри Душанбе бошад, 1 миллиону 300,8 ҳазор нафар аҳолӣ ба қайд гирифта шудааст. Дар Вилояти Мухтори Кӯҳистони Бадахшон шумораи аҳолӣ 236,8 ҳазор нафарро ташкил медиҳад.

Dialog.TJ