Мутахассисони Созмони интиқоли хуни Ҷумҳурии Исломии Эрон, аз ҷумла Доктор Аминӣ Нава Иброҳим, мутахассиси бахши коркарди хуни донорӣ ва Доктор Мирзиён Фотема Бадеъалӣ, мутахассиси бахши вирусология ва бехатарии хуни донорӣ, барои омӯзиш, мубодилаи таҷрибаи касбӣ ва такмили ихтисоси кормандони соҳа ба муассисаи давлатии «Маркази ҷумҳуриявии илмии хун»-и Ҷумҳурии Тоҷикистон омаданд.

Тавре ки маркази матбуоти Вазорати тандурустӣ хабар медиҳад, мутахассисони эронӣ дар самти такмили ихтисос ва баланд бардоштани сатҳи донишу малакаи касбии кормандони муассиса чорабиниҳои омӯзишӣ баргузор намуданд.

“Дар раванди ҳамкорӣ масъалаҳои марбут ба технологияҳои муосир ва дастовардҳои навини соҳаи трансфузиология, коркарди хуни донорӣ, вирусология ва таъмини бехатарии хуни донорӣ мавриди омӯзиш ва мубодилаи таҷриба қарор гирифтанд”, - навиштааст манбаъ.

Иттилоъ дода мешавад, ки мутахассисони Эрон ҷиҳати татбиқи санади ҳамкорӣ миёни муассисаи давлатии «Маркази ҷумҳуриявии илмии хун»-и Ҷумҳурии Тоҷикистон ва Созмони интиқоли хуни Ҷумҳурии Исломии Эрон, ки дар доираи сафари давлатии президенти Ҷумҳурии Исломии Эрон Масъуд Пизишкиён ба Ҷумҳурии Тоҷикистон ба имзо расидааст, ба кишвари мо омадаанд.

Dialog.tj