Муҳаммадҳасан Асадӣ, шаҳрдори Шероз ва ҳайати ҳамроҳаш дар ҷараёни сафари расмӣ ба Тоҷикистон аз маҷмааи таърихию фарҳангии Ҳисор ва қалъаи бостонии ин шаҳр боздид карданд.

Ҳайати Шероз аз Қалъаи Ҳисор ва дигар ёдгориҳои таърихии воқеъ дар ҳудуди маҷмаа дидан карда, бо таърихи шаҳр, мероси фарҳангӣ ва ҷойгоҳи он дар рӯйдодҳои сиёсию иҷтимоии давраҳои гузашта шинос шуданд.

Зимни боздид ба аҳамияти ҳифз ва нигоҳдории ёдгориҳои таърихӣ ва муаррифии онҳо ба сайёҳони дохиливу хориҷӣ ҳамчун яке аз самтҳои рушди сайёҳӣ ва фарҳангӣ таъкид шудааст.

Ҳайати шаҳри Шероз ҳамчунин, аз дӯконҳои ҳунарҳои мардумии Ҳисор боздид карда, бо маҳсулоти дастии ҳунармандони маҳаллӣ, аз ҷумла корҳои дӯзандагӣ ва дигар навъҳои ҳунарҳои суннатӣ шинос шудаанд.

Аъзои ҳайати Шероз маҳорати ҳунармандони Ҳисорро баланд арзёбӣ карда, гуфтаанд, ки дастгирии чунин ташаббусҳо метавонад ба рушди ҳунарҳои мардумӣ, ҳимояти занон ва ҳунармандон ва муаррифии фарҳанги миллии Тоҷикистон мусоидат кунад.

Ин боздид дар доираи талошҳо барои густариши робитаҳои дӯстона ва ҳамкории фарҳангиву иқтисодӣ миёни ду шаҳри таърихӣ - Шероз ва Ҳисор, сурат гирифтааст.

Dialog.tj