Владимир Путин, раиси ҷумҳури Русия нависандаи маъруфи тоҷик Темур Зулфиқоровро ба муносибати 90-солагиаш табрик гуфта, саҳми ӯро дар рушди адабиёт ва таҳкими ҳамдигарфаҳмии миёни халқҳо таъкид кардааст.

Дар паёми табрикотие, ки ба муносибати ҷашни солгарди адиб ирсол шудааст, Путин Зулфиқоровро ҳамчун нависанда, драматург, шоир ва маорифпарваре тавсиф кардааст, ки бо осори худ Тоҷикистонро дар хориҷ аз кишвар муаррифӣ кардааст.

Президенти Русия гуфтааст, ки фаъолияти эҷодии Зулфиқоров ба густариши забон ва адабиёти рус ва тарғиби арзишҳои башардӯстона низ мусоидат кардааст.

«Шумо дар таҳкими дӯстӣ ва ҳамдигарфаҳмӣ миёни халқҳо саҳми назаррас гузоштаед», — омадааст дар паёми табрикотӣ.

Табрикномаи Путинро дар маросими таҷлил аз 90-солагии адиб сафири Русия дар Тоҷикистон Семён Григорев қироат кардааст.

Зулфиқоров 17-уми августи соли 1936 дар Душанбе ба дунё омадааст. Ӯ Донишкадаи адабии ба номи Максим Горкийро хатм карда, дар тӯли фаъолияти эҷодиаш беш аз 30 китоб ба нашр расондааст. Осори ӯ жанрҳои гуногун, аз ҷумла наср, шеър ва драматургияро фаро мегиранд.

Зулфиқоров, инчунин, ҳамчун сенариянавис фаъолият доштааст. Бар асоси сенарияҳои ӯ тақрибан даҳ филм ба навор гирифта шудааст, аз ҷумла «Одам аз паси паррандаҳо меравад» ва «Мурғи сиёҳ».

Дар соли 1991 ӯ барои беҳтарин сенария соҳиби ҷоизаи «Хартли-Мирелл» шудааст. Зулфиқоров ҳамчунин, барандаи ҷоизаҳои «Ясная Поляна» ва «Беҳтарин китоби сол» мебошад.

Ҷашни 90-солагии ӯ дар ҳоле баргузор мешавад, ки осори Зулфиқоров дар тӯли чанд даҳсола миёни адабиёти тоҷик ва рус пулҳои фарҳангӣ эҷод кардааст.

Dialog.tj