Ҷумҳурии Тоҷикистон ва Ҷумҳурии Исломии Эрон мақсад доранд ҳаҷми интиқоли нафти хом ва маҳсулоти нафтӣ миёни ду кишварро афзоиш диҳанд. Барои ин, Душанбе омодагӣ дорад иқтидорҳои нақлиётӣ ва инфрасохтори логистикии марбут ба интиқоли чунин борҳоро густариш диҳад.

Вазири нақлиёти Тоҷикистон Азим Иброҳим баъд аз мулоқот бо вазири нафти Эрон Муҳсин Покнажод гуфт, ки логистика ва роҳҳои интиқоли маҳсулоти нафтӣ яке аз масъалаҳои калидӣ дар рушди ҳамкориҳои энергетикии ду кишвар ба шумор меравад. Ба гуфтаи ӯ, ҳоло миёни Тоҷикистон ва Эрон тақрибан 800 ҳазор тонна маҳсулоти нафтӣ интиқол дода мешавад. Аммо пас аз мулоқоти ахир ва оғози фаъолияти гурӯҳи муштараки корӣ, ин ҳаҷм метавонад ба таври назаррас афзоиш ёбад.

Азим Иброҳим гуфт, ки дар ин замина роҳҳои интиқоли маҳсулоти нафтӣ аз нав баррасӣ шуда, барои зиёд кардани иқтидори интиқол ва логистика тадбирҳои зарурӣ андешида мешаванд.

Вазири нақлиёти Тоҷикистон Азим Иброҳим ҳамчунин, таъкид кард, ки дар сурати афзоиши воридоти нафти хом ва маҳсулоти нафтӣ аз Эрон, Душанбе барои фароҳам овардани инфрасохтори зарурӣ бо кишварҳои ҳамсоя низ гуфтушунид хоҳад кард.

Мақомоти Тоҷикистон мегӯянд, ки рушди роҳҳои интиқол ва инфрасохтори логистикӣ метавонад барои густариши ҳамкориҳои энергетикии Душанбе ва Теҳрон заминаи бештар фароҳам созад.

Dialog.tj