Рӯзномаи амрикоии “Уолл-Стрит Журнал” иддао кардааст, ки Эрон мушовирони худро барои мулоқот бо гурӯҳҳои ҳампаймони худ дар минтақа ба Ироқ, Яман ва Лубнон фиристодааст, то сенарияҳои эҳтимолии густариши низоъро баррасӣ кунанд.

Ба гузориши хабаргузории “Меҳр”, ин рӯзнома бо такя ба мақомоти огоҳ навиштааст, ки мушовирони эронӣ ба кишварҳои мазкур сафар карда, роҳҳои эҳтимолии васеъ кардани доираи даргириҳо дар минтақаро баррасӣ мекунанд.

Бар асоси ин гузориш, мақомоти истихборотии кишварҳои арабӣ нишонаҳоеро пайгирӣ кардаанд, ки аз иртибот миёни Эрон ва гурӯҳҳои ҳампаймони он дар Ироқ, Яман ва Лубнон дарак медиҳанд.

“Уолл-Стрит Журнал” ба нақл аз манобеи худ менависад, ки ин иқдом метавонад нишонаи тағйири равиши стратегии мақомоти Эрон бошад. Ба гуфтаи ин манобеъ, ҳадаф омода кардани неруҳои ҳампаймон барои эҳтимоли густариши ҷанг ва афзоиши фишорҳо бар Иёлоти Муттаҳида аст.

Ин иддао дар ҳоле матраҳ мешавад, ки муҳлати думоҳаи созиши муваққатии миёни Эрон ва ИМА барои расидан ба тавофуқи доимӣ ба поён расидааст. Музокирот, тибқи гузориш, дар пайи ихтилофҳо бар сари иҷрои уҳдадориҳои пешбинишуда ва иддаои монеъасозии ҷониби Амрико ба бунбаст расидааст.

Дар ҳамин ҳол, Уолл-Стрит Журнал” иддао мекунад, ки мақомоти ҳукумати ИМА пас аз имзои созиши муваққатӣ миёни Доналд Трамп ва Эрон дар моҳи июн талошҳое барои расидан ба тавофуқ анҷом додаанд, ки боз шудани тангаи Ҳурмуз ва поёни тадриҷии ҷангро дар пай дошта бошад.

Ба гуфтаи манобеи эронӣ ва арабии ин рӯзнома, мақомоти Эрон созиши муваққатиро талоши Вашингтон ва Тел-Авив барои коҳиш додани фишор ба иқтисоди ҷаҳонӣ ва ба даст овардани вақт, пеш аз эҳтимоли оғози ҳамлаи густардатар ба Эрон, арзёбӣ мекунанд.

Бо вуҷуди ин, иддаоҳои мазкур аз ҷониби манобеи мустақил тасдиқ нашудаанд.

Dialog.tj