Тоҷикистон яке аз истеҳсолкунандагони муҳимми пахта дар минтақаи Осиёи Марказӣ ба ҳисоб меравад ва Эрон дар солҳои охир ба яке аз харидорони асосии пахтаи кишвар табдил ёфтааст.

Муҳаммадалӣ Амирфахриён, мушовири бозори Эрон дар Тоҷикистон гуфтааст, ки Тоҷикистон дар соҳаи пахтакорӣ таҷрибаи тӯлонӣ ва дар бахши кишоварзӣ зарфияти назаррас дорад. Ба гуфтаи ӯ, густариши робитаҳои иқтисодии Тоҷикистону Эрон дар солҳои охир барои афзоиши содироти пахтаи Тоҷикистон ба бозори Эрон замина фароҳам кардааст.

 “Таъмини мунтазами пахта, ки барои саноати нассоҷии Эрон зарур аст, яке аз самтҳои муҳимми ҳамкории ду кишвар мебошад” - зикр кард Муҳаммадалӣ Амирфахриён.

Муҳаммадалӣ Амирфахриён бар ин назар аст, ки рушди тиҷорати пахта метавонад танҳо бо содироти ашёи хом маҳдуд нашуда, барои тавсеаи ҳамкории саноатӣ, интиқоли технология ва эҷоди арзиши иловашуда замина гузорад. Ба гуфтаи ӯ, сиёсати саноатии Тоҷикистон ба коҳиши содироти ашёи хом ва рушди истеҳсолоти дохилӣ равона шудааст. Душанбе талош дорад тамоми занҷираи истеҳсоли маҳсулоти нассоҷӣ, аз парвариши пахта то истеҳсоли нах, ришта ва матоъро, густариш диҳад.

Мушовири тиҷоратии Эрон дар Тоҷикистон ҳамчунин, гуфтааст, ки кишвар барои ҷалби сармоя, технология ва ташкили ҳамкории шарикӣ бо ширкатҳои хориҷӣ талош дорад. Эрон дар ҳоли ҳозир харидори асосии нахи пахтаи Тоҷикистон мебошад.

Бар асоси маълумоти Агентии омори Тоҷикистон, дар шаш моҳи аввали соли ҷорӣ кишвар ба маблағи 73,5 миллион доллар нахи пахта содир кардааст. Ин нишондиҳанда нисбат ба ҳамин давраи соли 2025 18,9 миллион доллар бештар аст.

Аз ҳаҷми умумии содироти нахи пахта 61,8 дарсад ба Эрон, 25,5 дарсад ба Туркия, 8 дарсад ба Чин ва 3 дарсад ба Русия рост меояд. Қисми боқимонда ба Ӯзбекистон, Латвия ва Амороти Муттаҳидаи Араб содир шудааст.

Dialog.tj