Дар шаҳри Душанбе бо иштироки намояндагони мақомоти марбутаи Ҷумҳурии Тоҷикистон ва Ҷумҳурии Корея оид ба оғози расмии татбиқи лоиҳаи «Рушди нақлиёти ҳушманд дар шаҳри Душанбе» ҷаласаи корӣ доир гардид.

Тавре ки маркази матбуоти Вазорати нақлиёти Ҷумҳурии Тоҷикистон хабар медиҳад, зимни ҷаласа аз ҷониби Консорсиуми Донишкадаи нақлиёти Корея дар ҳайати ширкатҳои «Dong Myeong Engineering Consultants», «HD», Донишгоҳи Сеул ва Роҳи оҳани миллии Корея, ки татбиқи лоиҳаи мазкурро бар уҳда доранд, рӯнамо баргузор карда шуда, оид ба паҳлуҳои муҳими лоиҳа миёни намояндагони Ҷумҳурии Тоҷикистон ва Ҷумҳурии Корея  табодули афкор сурат гирифт. 

Манбаъ навиштааст, ки муовини якуми вазири нақлиёти Ҷумҳурии Тоҷикистон Фаррух Неъматзода иброз дошт, ки дар шароити рушди босуръати шаҳрҳо масъалаи ташкили низоми нақлиёти бехатар, самаранок, устувор ва ба талаботи замони муосир ҷавобгӯ аҳамияти рӯзафзун пайдо намудааст.

Гуфта мешавад, ки лоиҳаи «Рушди нақлиёти «ҳушманд» дар шаҳри Душанбе, солҳои 2026-2028», ки дар доираи консепсияи «Шаҳри ҳушманд» (Smart city) таҳия гардидааст, аз ҷониби Консорсиуми Донишкадаи нақлиёти Корея дар ҳайати Донишкадаи нақлиёти Корея, ширкатҳои «Dong Myeong Engineering Consultants», «HD», Донишгоҳи Сеул ва Роҳи оҳани миллии Корея ва дар ҳамкории зич  бо мақомот ва ниҳодҳои дахлдори Ҷумҳурии Тоҷикистон татбиқ карда мешавад.  

Dialog.tj