Ширкати ҳавопаймоии «Сомон Эйр» парвозҳои мунтазами мустақимро ҳафтае як маротиба, рӯзҳои шанбе дар масири Душанбе — Минск — Душанбе аз 29-ум август бо ҳавопаймои нави «Boeing 737-8 MAX» оғоз менамояд.

Тавре ки АМИТ «Ховар» бо такя ба маълумоти Агентии авиатсияи граждании назди Ҳукумати Ҷумҳурии Тоҷикистон иттилоъ медиҳад, мусофирон имкон доранд чиптаҳои ҳавопайморо дар масири Душанбе — Минск — Душанбе тавассути сомонаи расмии ширкати ҳавопаймоии «Сомон Эйр» дастрас намоянд.

Манбаъ навиштааст, ки парвозҳои мустақим дар масири Душанбе — Минск — Душанбе ба таҳкими робитаҳои нақлиёти ҳавоӣ байни Ҷумҳурии Тоҷикистон ва Ҷумҳурии Беларус, рафтуомади бемушкили шаҳрвандони ду кишвар ва рушди ҳамкории иқтисодӣ, тиҷоратӣ, сайёҳӣ ва гуманитарӣ мусоидат мекунад.

Гуфта мешавад, ки оғоз гардидани парвозҳои мустақими ҳавоӣ байни Душанбе ва Минск дар ҳолест, ки чанде пеш бо мақсади рушди соҳаи авиатсияи граждании кишвар ба парки ҳавопаймоҳои ширкати ҳавопаймоии «Сомон Эйр» ҳавопаймои навъи«Boeing 737-8 MAX» ворид шуд.

Dialog.tj