Сафири фавқулода ва мухтори Тоҷикистон дар Ҷумҳурии Исломии Эрон Низомиддин Зоҳидӣ бо раиси Анҷумани осор ва мафохири фарҳангии Эрон Маҳмуди Шолуӣ дар бораи густариши ҳамкориҳо дар бахшҳои илму фарҳанг гуфтугӯ кард.

Ба гузориши АМИТ “Ховар”, дар ин мулоқот ҷонибҳо перомуни роҳҳои тавсеаи ҳамкориҳои илмию фарҳангӣ ва баргузории чорабиниҳои муштарак табодули назар намуданд.

Дар ҷараёни мулоқот таъкид шуд, ки Анҷумани осор ва мафохири фарҳангии Эрон дар канори бузургдошти чеҳраҳои барҷастаи илму фарҳанги Эрон, аз хидматҳои илмӣ ва фарҳангии донишмандону адибони кишварҳои форсизабон низ қадрдонӣ мекунад.

Бар асоси гузориш, ин анҷуман дар солҳои гузашта маҳфилҳои бузургдошти устодон Садриддин Айнӣ, Бобоҷон Ғафуров, Муҳаммадҷон Шакурӣ ва Лоиқ Шералиро баргузор намуда, маҷмуаи мақолаҳое роҷеъ ба зиндагӣ ва осори ин шахсиятҳои маъруфи Тоҷикистон низ ба нашр расондааст.

Ҷонибҳо ҳамчунин, имкони баргузории барномаҳои муштараки илмию фарҳангиро ба муносибати бузургдошти дигар чеҳраҳои намоёни Тоҷикистон мавриди баррасӣ қарор доданд.

Dialog.tj