Бинобар иттилои Рустам Мирзозода, раиси Суди Олии Ҷумҳурии Тоҷикистон, дар нимсолаи якуми соли равон судҳои ҷумҳурӣ дар маҷмуъ 80 ҳазору 193 парванда ва маводи гуногунро дар марҳилаҳои якум, кассатсионӣ ва назоратӣ баррасӣ карданд.

Дар нишасти хабарӣ иттилоъ дода шуд, ки парванда ва маводи гуногуни баррасишуда нисбат ба ҳамин давраи соли гузашта, 6 401 зиёд аст.

Гуфта шуд, ки дар давраи ҳисоботӣ 8 438 парвандаи гражданӣ, 20 785 парвандаи оилавӣ, 6 495 парвандаи ҷиноятӣ, 31 496 парвандаи ҳуқуқвайронкунии маъмурӣ, 4 519 дархости мақомоти тафтиши пешакӣ ва 3 957 пешниҳоди сохтору мақомоти дахлдор баррасӣ гардиданд.

Зикр гардид, ки дар нимсолаи якум дар доираи Қонуни Ҷумҳурии Тоҷикистон “Дар бораи масъулият барои таълиму тарбияи кӯдак” 8 392 парвандаи ҳуқуқвайронкунии маъмурӣ баррасӣ шуда, нисбат ба 7 224 кас ба маблағи умумии 5 миллиону 731 ҳазору 318 сомонӣ ҷарима таъин гардидааст.

Ҳамчунин, афзуда шуд, ки дар натиҷаи фаъолияти судҳо дар нимсолаи якуми соли 2026 аз ҳисоби боҷи давлатӣ, ҷаримаҳо, мусодираи молу мулк ва дигар пардохтҳо ба маблағи умумии 119 миллиону 975 ҳазору 403 сомонӣ ба фоидаи давлат рӯёнида шудааст.

Dialog.tj