Расонаи амрикоии “CBS News гузориш додааст, ки барномарезони низомии Иёлоти Муттаҳида чандин сенарияи эҳтимолии амалиёти низомӣ алайҳи Кубаро мавриди баррасӣ қарор додаанд. Ба гуфтаи манобеи огоҳ, яке аз ин тарҳҳо анҷоми ҳамлаи ҳавоӣ бо ҷалби ҳазорон сарбози амрикоӣ мебошад.

Ба навиштаи ин расона, ду мақоми амрикоӣ гуфтаанд, ки дар сурати иҷро шудани чунин амалиёт, он эҳтимолан аз ҷониби Дивизияи 101-уми ҳавобурди артиши Амрико анҷом хоҳад шуд. Ба гуфтаи ин манобеъ, ин воҳид барои чунин амалиёт омӯзиш дидааст.

Бо вуҷуди ин, мақомоти амрикоӣ таъкид кардаанд, ки таҳияи чунин нақшаҳо ба маънои қабули тасмими ниҳоӣ аз ҷониби Доналд Трамп, раиси ҷумҳури Иёлоти Муттаҳида ё Вазорати ҷанги ин кишвар барои ҳамла ба Куба нест.

“CBS” ҳамчунин, гузориш додааст, ки ҳар гуна амалиёти низомӣ алайҳи Куба бо мушкилоти ҷиддӣ рӯбарӯ хоҳад шуд, зеро бахши қобили таваҷҷуҳи тавон ва захираҳои низомии Амрико ҳоло дар Ховари Миёна мустақар буда, ба амалиётҳои низомии ин кишвар марбут мебошанд.

Дар ҳамин ҳол, Марко Рубио, вазири хориҷаи Амрико, ҳамоно аз гузариши қудрат дар Куба тавассути роҳи дипломатӣ ва ташкили ҳукумате ҷонибдорӣ мекунад, ки омодаи ислоҳоти иқтисодӣ бошад.

Ба гузориши “CBS”, Пентагон моҳи гузашта нишасте барои баррасии ибтидоии имконоти амалиёти низомӣ баргузор кардааст. Дар чунин баррасиҳо маъмулан аҳдофи амалиёт, теъдоди неруҳои лозим, масъалаҳои логистикӣ, ҷадвали замонӣ ва хатарҳои эҳтимолӣ арзёбӣ мешаванд.

Ин расона, инчунин, аз ихтилофҳои дохилӣ дар ҳукумати Амрико дар бораи сиёсати низомӣ хабар додааст. Бар асоси ин гузориш, баъзе манобеъ мегӯянд, Доналд Трамп дар маҳфилҳои хусусӣ аз ҷараёни баъзе амалиётҳои низомӣ изҳори норозигӣ кардааст, ҳарчанд дар изҳороти оммавӣ аз раҳбарияти низомии кишвараш ҳимоят намудааст.

Дар ҳамин ҳол, Анна Келлӣ, сухангӯи Кохи Сафед, ин иддаоҳоро рад карда, гуфтааст, ки раиси ҷумҳур аз раҳбарии мақомоти низомии Амрико дар ҷараёни амалиётҳои ахир пурра ҷонибдорӣ мекунад.

Ҷоэл Валдез, сухангӯи муваққатии Пентагон низ дар посух ба пурсиши “CBS” гуфтааст, Вазорати ҷанг дар бораи амалиётҳои эҳтимолии низомӣ изҳори назар намекунад ва аз шарҳи гуфтугӯҳои хусусии миёни вазири ҷанг ва раиси ҷумҳур худдорӣ кардааст.

Dialog.tj