Тибқи иттилои Бунафша Файзиддинзода, раиси Кумитаи кор бо занон ва оилаи назди Ҳукумати Ҷумҳурии Тоҷикистон давоми шаш моҳи соли равон барои дарёфти гранти президентӣ 945 лоиҳа пешниҳод гардидааст.

Дар нишаст иттилоъ дода шуд, ки ҳоло лоиҳаҳои пешниҳодшуда аз ҷониби комиссияи озмун баррасӣ карда мешаванд.

Афзуда шуд, ки дар соли сипаригашта 200 зани ҳунарманду соҳибкор ба маблағи умумии 15 миллион сомонӣ соҳиби гранти Президенти Ҷумҳурии Тоҷикистон гардиданд, ки дар натиҷа 1225 ҷойи нави кор таъсис дода шуд.

Ёдовар мешавем, ки барои дастгирии фаъолияти бонувони соҳибкор аз соли 2006 инҷониб дар ҳудуди кишвар гранти президентӣ пешбинӣ шудааст, ки ҳар сол барои пешбурди тиҷорату ҳунар ба бонувон дастрас мегардад. Ин ташаббуси Пешвои миллат ба бонувоне нигаронда шудааст, ки қодиранд ҳам ҳаёти худ ва ҳам аз чандин занони бекорро беҳтар намоянд.

Бояд гуфт, ки доираи фаъолияти соҳибкории занон, ки гранти президентӣ мегиранд, хеле васеъ буда, онҳо ба эҳёи ҳунарҳои миллӣ, таъсиси коргоҳҳои хурди ҳунарҳои дастӣ, қолинбофӣ, парвариши чорвову парандаву моҳӣ, коркарди меваи хушк ва ғайраҳо шуғл меварзанд.

Dialog.tj