Аз 29-уми июн то 2-юми июл дар шаҳри Душанбе ҷаласаи 45-уми Шурои идоракунандагони Фонди Иқлими Сабз (Green Climate Fund) баргузор гардид, ки дар кори он роҳбарият ва аъзоёни Шурои Фонди мазкур, намояндагони созмонҳои молиявии байналмилалӣ ва коршиносон иштирок намуда, масъалаҳои муҳими вобаста ба фаъолияти Фондро баррасӣ намуда, лоиҳаҳои навро дар самти мубориза бо пайомадҳои ногувори тағйирёбии иқлим дар сатҳи ҷаҳонӣ муҳокима ва тасдиқ намуданд.

Тибқи иттилои маркази матбуоти Кумитаи ҳизфи муҳити зисти назди Ҳукумати Ҷумҳурии Тоҷикистон, дар ҷаласаи мазкур барои Ҷумҳурии Тоҷикистон 2 лоиҳаи нави муҳим бо арзиши умумии 190 миллион доллари ИМА тасдиқ гардид, ки аз он 62 миллион долларашро грант ё кумаки бебозгашти Фонди Иқлими Сабз ташкил медиҳад.

“Лоиҳаи якум бо маблағи 30 миллион доллари ИМА барои дастгирии 14 шаҳру ноҳияи мамлакат ҷиҳати беҳтарсозии ҷомеаҳои осебпазир, аз ҷумла ҷорӣ намудани технологияҳои каммасрафи об ва таъсиси фонди боғҳои мевадиҳанда равона карда мешавад. Лоиҳаи дуюм барои навсозии шабакаҳои оби нӯшокӣ ва корезии шаҳрҳои Роғун, Данғара ва Хуҷанд равона гардида, инчунин, таъмири шабакаҳои обёрикунӣ амалӣ карда мешавад. Ин лоиҳа бо ҷалби маблағҳои грантии Фонди Иқлими Сабз ва қарзи Бонки Аврупоии Таҷдид ва Рушд (БАТР) татбиқ мегардад”, - навиштааст манбаъ.

Dialog.tj