Нахуствазири Ҷопон зимни маросиме ба муносибати солгарди поёни набарди Окинава ба эътирози фаъолони зиддиҷанги кишвараш рӯбарӯ шуд. Ин дар ҳолест, ки интиқодҳо аз тағйири рӯйкарди амниятии Токио ва дур шудани он аз сиёсати деринаи сулҳталабонааш афзоиш ёфтааст.

Ба гузориши хабаргузории “Франс пресс”, ки рӯзи чоршанбе нашр шуд, Санаэ Такаити дар ҷараёни як маросими ёдбуди Ҷанги ҷаҳонии дувум бо шиорҳои эътирозии тазоҳуротчиёне рӯбарӯ шуд, ки аз дур шудани ҳарчи бештари Токио аз мавқеи дерина ва сулҳталабонаи худ дар даҳсолаҳои гузашта хашмгин буданд.

Ҷопон, ки яке аз муттаҳидони наздики Иёлоти Муттаҳидаи Амрико ба шумор меравад, дар моҳи апрел қонунҳои марбут ба содироти аслиҳаи марговарро осонтар кард. Ҳамчунин, Такаити, ки муддатҳо ба унвони сиёсатмадори моил ба рӯйкардҳои сахтгиронаи амниятӣ шинохта мешавад ва соли гузашта бо изҳороти худ дар бораи Тайван бо Чин таниш эҷод карда буд, эълом кардааст, ки қасди бознигарии Конститутсияи кишварро дорад.

Дар ҷараёни суханронии Такаити ва дар маросиме ба муносибати 81-умин солгарди поёни Набарди Окинава (набарде, ки дар он ҳудуди 200 ҳазор ҷопонӣ ҷони худро аз даст доданд), бархе аз эътирзгарон бо садои баланд шиор пароканданд.

Ин шиорҳо, аз ҷумла “Не ба ҷанг!” ва “Аз моддаи 9-и Конститутсия муҳофизат кунед!” буд: иборае, ки ба банди Конститутсияи Ҷопон ишора дорад, ки дар он ҷанг ҳамчун василаи ҳаллуфасли ихтилофҳои байналмилалӣ рад шудааст.

Такаити дар ин суханронӣ гуфт: “Ҳар гоҳ ба андӯҳ ва ҳасрати ҳамаи касоне, ки дар ҷанг ҷони худро аз даст доданд ва ҳамчунин, ба ранҷи хонаводаҳои доғдор меандешам, қалбам аз андӯҳи амиқ саршор мешавад”.

Ӯ афзуд: “Ҷопон дар чорчӯби уҳдадории устувор барои он, ки дигар ҳаргиз фоҷиаи ҷанг такрор нашавад, бо қатъият дар ин масир пеш рафтааст ва ҳамчун кишваре, ки болотарин арзишро барои сулҳ қоил аст, ба ҳаракати худ идома додааст”.

Дар моҳҳои охир, эътирозҳои мунтазам нисбат ба тағйироти сиёсӣ дар давлати Такаити шакл гирифтааст. Ин тағйирот ҳамчунин, бо вокуниши Чин рӯбарӯ шуда, ба гунае, ки Пекин Токиоро ба эҳёи “низомигарӣ”-и давраи ҷанг муттаҳам мекунад.

Dialog.tj