Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон субҳи 20-уми июн бо сафари корӣ роҳии ноҳияи Ховалинги вилояти Хатлон шуданд.

Сомонаи расмии Сарвари давлат, имрӯз, 20-уми июн аз сафари кории Президенти кишвар муҳтарам Эмомалӣ Раҳмон ба ноҳияи Ховалинги вилояти Хатлон хабар доду мақсади онро “ифтитоҳи як қатор иншооти ҷашнӣ, гузоштани санги асос ба сохтмони иншооти оянда, суҳбат бо мардуми касбу кори гуногун ва шиносоии бевосита бо вазъи зиндагии аҳолӣ” навишт.

Дар доираи ин сафар, дар фурудгоҳи ноҳияи Ховалинг Президенти кишварро намояндагони мақомоти маҳаллӣ ва масъулони вилояти Хатлон пешвоз гирифтаанд.

Ҳамчунин, дар оғози боздид Пешвои миллат бинои маъмурии фурудгоҳи Ховалингро пас аз навсозӣ мавриди истифода қарор додаанд.

Дар гузориш оид ба навсозии Фурудгоҳи Ховалинг чунин таъкид мешавад: “Тармиму навсозии бинои маъмурии фурудгоҳ дар пайравӣ ба сиёсати бунёдкоронаи Ҳукумати кишвар аз ҷониби соҳибкорони ҳимматбаланди ноҳия ба хотири ободии Ватан ва мунтазам беҳтар намудани сифати зиндагии аҳолӣ анҷом дода шудааст”.

Тибқи иттиллоъ иншооти нав бо риояи талаботи муосири меъморӣ ва унсурҳои миллӣ бунёд шуда, барои кормандону мусофирон шароити беҳтари хизматрасонӣ фароҳам меорад.

Президенти Тоҷикистон зимни боздид ба сифати корҳои анҷомшуда баҳои баланд додаанд.

Dialog.tj