Тавре ки маркази матбуоти Маҷлиси намояндагони Маҷлиси Олии Ҷумҳурии Тоҷикистон хабар медиҳад, 9-ум ва 10-уми апрел дар шаҳри Тошканди Ҷумҳурии Узбекистон муколамаи сеюми минтақавии вакилони парлумони кишварҳои Осиёи Марказӣ таҳти унвони «Миқёспазирии иқтисоди даврӣ дар Осиёи Марказӣ тавассути роҳбарии бизнес, навоварӣ ва механизмҳои молиявӣ» баргузор гардид.

Ба навиштаи манбаъ, дар чорабинии мазкур Ориф Амирзода, раиси Комиссияи экологии Маҷлиси намояндагони Маҷлиси Олии Ҷумҳурии Тоҷикистон, Фирдавс Саидзода, муовини раиси Кумита оид ба энергетика, саноат, сохтмон ва коммуникатсия ва Фарҳод Каримзода, узви ҳамин кумита иштирок намуданд.

Гуфта мешавад, ки муколамаи сеюми минтақавии вакилони парлумони кишварҳои Осиёи Марказӣ дар доираи барномаи SWITCH-Asia бо дастгирии Иттиҳоди Аврупо ва Маркази минтақавии экологии Осиёи Марказӣ (CAREC) доир шуда, дар он вакилони парлумон, намояндагони институтҳои байналмилалии молиявӣ, бахши хусусӣ ва ҷомеаи коршиносони кишварҳои Осиёи Марказӣ ширкат варзиданд.  

Иттилоъ дода мешавад, ки Ориф Амирзода зимни суханрониаш қайд намудааст, ки гузариш ба иқтисоди даврӣ на танҳо диду назари стратегиро талаб мекунад, балки фароҳам овардани шароити мушаххас барои сармоягузорӣ, рушди бозор ва ҷалби бахши хусусиро низ тақозо менамояд.

Dialog.tj