30-юми март дар шаҳри Самарқанд Мавсума Муинӣ, муовини раиси Маҷлиси намояндагони Маҷлиси Олии Ҷумҳурии Тоҷикистон бо Содиқ Сафоев, муовини якуми раиси Сенати Мажлиси Олии Ҷумҳурии Узбекистон мулоқот намуд.

Тавре ки маркази матбуоти Маҷлиси намояндагони Маҷлиси Олии Ҷумҳурии Тоҷикистон хабар медиҳад, зимни вохӯрӣ ҷонибҳо роҷеъ ба муҳимтарин масъалаҳои байнидавлатию ҳамкориҳои байнипарламентӣ миёни кишварҳои Тоҷикистону Узбекистон суҳбат намуда, ҳамзамон ҷиҳати минбаъд низ роҳандозӣ намудани ҳамкориҳо дар самти табодули таҷриба оид ба такмили қонунгузорӣ, парламентаризм ва рушди иқтисодиву иҷтимоӣ ибрози ақида намуданд.

Манбаъ меафзояд, ки мулоқоти мазкур дар ҳошияи иштироки ҳайати парламентӣ дар нахустин Форуми байнипарлумонии Осиёи Марказӣ – Иттиҳоди Аврупо баргузор гардид.

Гуфта мешавад, ки нахустин Форуми байнипарлумонии Осиёи Марказӣ – Иттиҳоди Аврупо ба як майдони муҳими байналмилалӣ табдил ёфта, ба таҳкими муколамаи байнипарлумонӣ, густариши эътимоди сиёсӣ ва дар ташаккули механизмҳои устувори ҳамкорӣ байни кишварҳои Осиёи Марказӣ ва Иттиҳоди Аврупо такони ҷиддӣ мебахшад.

Dialog.tj