Вазири корҳои хориҷии Ҷумҳурии Исломии Эрон дар мусоҳиба бо шабакаи “NBC” гуфт: “Роҳбар ва раисҷумҳури Эрон дар саломатии комил ҳастанд.

Ба гузориши “ИРНА” Сайид Аббос Ироқчӣ, вазири корҳои хориҷии Эрон дар гуфтугӯ бо “NBC News” бо эълони хабари саломатии комили Роҳбари Инқилоби Исломии Эрон ва раисҷумҳур гуфт: “Аксарияти масъулин низ хуб ҳастанд ва танҳо як ё ду нафар аз фармондеҳон шаҳид шудаанд”.

Вай илова кард: “Намедонам чаро давлати Амрико исрор дорад музокираро оғоз кунад ва пас дар миёнаи он ба ҷонибдории муқобил ҳамла кунад. Шояд дигарон буданд, ки Амрикоро барои манофеи худ ба ин муноқиша кашиданд”.

Ҳамлаҳои мо ба пойгоҳҳои Амрико дар минтақа як иқдоми дифоӣ аст

Вазири корҳои хориҷии Эрон дар бахши дигаре аз суханонаш гуфт: “Бо ҳамкоронам дар кишварҳои минтақаи Халиҷи Форс дар тамос будам ва шарҳ додам, ки мо ният надорем, ба онҳо ҳамла кунем, балки ҳамлаҳои мо ба пойгоҳҳои Амрико дар минтақа як иқдоми дифоӣ аст. Мо намехостем, ки нишаста бошем ва ба дигарон беҷавоб бимонем”.

Омодаем ҳар коре анҷом диҳем, то собит кунем, ки барномаи ҳастаии мо сулҳомез аст

Ироқчӣ гуфт: “Дар бораи барномаи ҳастаии мо, ба тими амрикоӣ равшан шарҳ додем, омодагии комил дорем, то собит кунем, ки барномаи ҳастаии мо сулҳомез аст ва барои ҳамеша ҳам сулҳомез хоҳад буд”.

Вай таъкид кард: “Он чи барои он омодагӣ надорем, чашмпӯшӣ аз ҳақамон аст. Мо аз ҳуқуқи худ даст намекашем, аз ҷумла аз ҳақи ғанисозӣ, вале омодагӣ дорем, ки барои эҷоди эътимод дар бораи барномаи ҳастаии худ иқдом кунем”.

Хоҳони ҷанг ва таниш дар минтақа нестем

Вазири корҳои хориҷии Эрон дар идома дар мусоҳиба телевизионӣ таъкид кард: “Мо мехоҳем, ки ҷанг ва ихтилоф дар минтақа набошад. Вале аввал бояд таҷовуз хотима ёбад, ҳамлаҳо бояд дар қадами аввал мутаваққиф шаванд”.

Вай идома дод: “Сипас, агар имкони гуфтугӯҳо вуҷуд дошт, метавонем онро мадди назар қарор диҳем, аммо дар мавриди чизе қавл намедиҳем, зеро мардумонамон дар ҳоли ҳозир хеле ғазаболӯданд”.

Ироқчӣ ҳамчунин, бо баёни ин, ки  дар ҳоли ҳозир тамос вуҷуд надорад гуфт: “Аммо амрикоиҳо медонанд чи гуна бо ман иртибот барқарор кунанд, агар бихоҳанд суҳбат кунанд. Ҳозир тамосе вуҷуд надорад”.

Наметавонед ҳукуматро тағйир диҳед дар ҳоле, ки миллионҳо нафар ҳомии ҳукумат ҳастанд

Вазири корҳои хориҷии Эрон ҳамчунин, дар ин мусоҳиба гуфт: “Шумо наметавонед ҳукуматро тағйир диҳед дар ҳоле ки миллионҳо нафар ҳомии ҳукумат ҳастанд. Фақат дар роҳпаймоии 22-и баҳмани имсол нигоҳ кунед, ки 30 миллион нафар дар хиёбонҳо чӣ гуна аз Инқилоби Исломӣ пуштибонӣ карданд”.

Ироқчӣ дар охир гуфт: “Мо миллати бузург бо тамаддуни аъзим ҳастем; ҳазорон сол устувор мондем. Мо медонем, ки чӣ гуна аз худ дифоъ кунем ва устувор мемонем”.

Dialog.tj