Полиси Англия рӯзи панҷшанбе Эндрю Маунтбеттен-Виндзор, бародари Чарлзи севум, подшоҳи ин кишварро дар иртибот бо ёфтаҳои тозаи марбут ба парвандаи Ҷеффри Эпштейн, сармоядори амрикоии муттаҳам ба ҷиноятҳои ҷинсӣ, боздошт кард.

Оливер Райт, муовини раиси полиси минтақаи Темз Велли, гуфт пас аз арзёбии комили асноди парванда, таҳқиқот оғоз шудааст ва полис барои ҳифзи “тамомият ва бетарафӣ”-и раванди баррасӣ, ҷузъиёти бештареро дар ин марҳила мунташир нахоҳад кард. Вай бо ишора ба ҳассосияти парванда гуфт, полис аз мизони таваҷҷуҳи умумӣ ба ин мавзуъ огоҳ аст ва дар замони муносиб иттилоърасонӣ хоҳад кард.

Дар ҳоле, ки полис аз ном бурдан худдорӣ кардааст, расонаҳои англисӣ гузориш додаанд фарди боздоштшуда Эндрю Маунтбеттен-Виндзор, бародари подшоҳ аст, ки солҳост номи ӯ бо парвандаи Ҷеффри Эпштейн, сармоядори бадноми амрикоии муттаҳам ба ҷиноятҳои ҷинсӣ, гиреҳ хӯрдааст.

Бар асоси гузоришҳо, меҳвари асноде, ки полис дар ҳоли баррасии он аст, ба даврони нақшҳои расмии пешини ӯ дар дарбор бармегардад ва акнун дар қолаби “сӯистифода аз мақоми умумӣ” мавриди расидагӣ қарор гирифтааст.

Парвандаи Эпштейн, ки тайи солҳои гузашта бахшҳое аз он дар қолаби аснод ва мукотибаҳое мунташир шудааст, борҳо номи бархе чеҳраҳои сиёсӣ ва иқтисодии Ғарбро ба ҳошия кашонда ва дар Англия низ ба яке аз сангинтарин чолишҳои ҳайсиятӣ барои хонадони салтанатӣ табдил шудааст. Эпштейн дар Амрико ба ҷиноятҳои ҷинсӣ муттаҳам буд ва дар соли 2019 дар зиндон ҷон бохт.

Бародари подшоҳи Англия пештар ҳар гуна ҳамкорӣ бо Эпштейнро рад карда буд. Фишорҳои сиёсӣ ва расонаӣ дар соли 2019 пас аз гуфтугӯи телевизионии ҷанҷолии ӯ бо “Би-би-сӣ” шиддат гирифт ва Эндрю эълом кард аз анҷоми вазифаҳои умумӣ канора мегирад. Чанд сол баъд низ ӯ дар парвандаи ҳуқуқии матраҳшуда аз сӯи Вирҷиния Ҷуфри дар Амрико ба тавофуқи берун аз додгоҳ расид, ки ҷузъиёти молии он маҳрамона боқӣ монд ва танҳо аз кумаки молии қобили таваҷҷуҳ ба як ниҳоди ҳимоятӣ сухан гуфта шуд.

Акнун бо вуруди парванда ба марҳилаи боздошт ва бозрасӣ, нозирон дар Англия мегӯянд он чи зери сояи эътибори рамзии салтанат пинҳон мемонд, бори дигар ба озмоиши посухгӯии ниҳодҳои ҳокимиятӣ табдил шудааст, ки натиҷаи он метавонад барои ҷойгоҳи хонадони салтанатӣ ва иддаоҳои дерина дар бораи меъёрҳои ахлоқӣ дар раъси қудрат, паёмадҳои тозае ба ҳамроҳ дошта бошад.

Dialog.tj