Амирхон Мутаққӣ, вазири корҳои хориҷаи гурӯҳи террористии Толибон ва Саъдӣ Шарифӣ, сафири Тоҷикистон дар Кобул дар мавриди равобити дуҷониба гуфтугӯ кардаанд.

Вазорати корҳои хориҷаи гурӯҳи террористи Толибон рӯзи панҷшанбе бо нашри хабарномае гуфтааст, ки дар ин дидор, ду тараф дар бораи тавсеаи равобити дипломатӣ, рафтуомади ҳайатҳо ва тақвияти ҳамкориҳои сиёсӣ, иқтисодӣ ва тиҷоратӣ гуфтугӯ кардаанд.

Бар асоси хабарнома, Амирхон Мутаққӣ, вазири корҳои хориҷаи гурӯҳи террористии Толибон гуфтааст, ки “Афғонистон ва Тоҷикистон ба унвони ду кишвари ҳамсоя ва бародар” бо муштаракоти фарҳангӣ ва забонии густарда метавонанд аз фурсатҳои мавҷуд барои густариши муносибатҳо дар ҳамаи сатҳҳо истифода кунанд.

Ӯ афзудааст, ки ҳеч касе наметавонад ба равобити дӯстона ва фазои эътимод миёни ду тараф осеб бирасонад ва Толибон тааҳҳуди қавӣ дар заминаи густариши ҳамкориҳо бо Тоҷикистон дорад.

Сафири Тоҷикистон низ дар бораи охирин таҳаввулот дар хусуси тавофуқоти қаблӣ миёни Кобул ва Душанбе ба вазири хориҷаи Толибон маълумот дода ва барномаҳои иқтисодӣ дар марзи муштаракро матраҳ кардааст.

Дар хабарнома омадааст, ки ду тараф дар мавриди баргузории кумитаи муштараки иқтисодӣ, тақвияти ҳамкориҳои марзӣ ва амниятӣ ва барномаҳои вазоратҳои умури хориҷаи ду тараф дар соли оянда табодули назар кардаанд.

Бояд таъкид кард, ки дар пайи нооромиҳои ахир дар марзи Тоҷикистону Афғонистон, ки чанде пеш дар натиҷаи ҳамлаи мусаллаҳона бархе кормандони як тарҳи роҳсозӣ, аз ҷумла шаҳрвандони Чин, ба қатл расонида шуданд, масоили амниятии марзӣ аҳамияти бештар касб кардааст. Дар ин хусус ин манобеи Толибон мегӯяд, ки ҷонибҳо бар зарурати таҳкими ҳамкориҳои амниятӣ барои ҷилавгирӣ аз такрори чунин ҳодисаҳо таъкид кардаанд.

Dialog.tj