Тавре ки маркази матбуоти Вазорати меҳнат, муҳоҷират ва шуғли аҳолии Ҷумҳурии Тоҷикистон хабар медиҳад, намояндагони вазорат дар ҷаласаи 5-уми Гурӯҳи кории муштарак оид ба мубориза бо муҳоҷирати ғайриқонунӣ, ки имрӯз 27-уми ноябр дар шаҳри Москва доир гардид, иштирок намуданд.

Манбаъ меафзояд, ки раиси гурӯҳи корӣ аз ҷониби Тоҷикистон муовини вазири меҳнат, муҳоҷират ва шуғли аҳолии Ҷумҳурии Тоҷикистон Шариф Норзода буда, зимни чорабинӣ ҷонибҳо масъалаҳои тағйиру иловаҳои асосӣ ва навовариҳо дар қонунгузории вобаста ба муҳоҷирати Федератсияи Русия ва Ҷумҳурии Тоҷикистон, ки солҳои 2024-2025 ба амал омадаанд, вазъи кунунии муҳоҷират дар ҳудуди ҳар ду давлат, аз ҷумла тағйирёбии ҷараёни муҳоҷирати меҳнатӣ, роҳҳои ошкоршудаи муҳоҷирати ғайриқонунӣ ва чораҳо барои пешгирии онҳо ва ғайраҳо баррасӣ карданд.

“Ба масъалаҳои марбут ба муҳоҷирати меҳнатии муташаккил, баланд бардоштани ҳифзи ҳуқуқии шаҳрвандони Тоҷикистон, ки дар Русия фаъолият мекунанд, инчунин чораҳои муштарак оид ба пешгирии вайронкунии қонунгузории муҳоҷират, аз ҷумла мубориза бо бақайдгирии сохта ва шуғли ғайриқонунӣ таваҷҷуҳи махсус зоҳир гардид”, - зикр мегардад дар иттилоия.

Иттилоъ дода мешавад, ки дар асоси натиҷаҳои ҷаласа ҷонибҳо омодагии худро ба рушди минбаъдаи ҳамкории созандаи дуҷониба дар самти муҳоҷират тасдиқ карда, инчунин, ҷиҳати таҳияи нақшаи навшудаи чорабиниҳои муштарак барои соли 2026 ба мувофиқа расиданд.

 Dialog.tj