Вазири дифои Ҷумҳурии Тоҷикистон дар сафари расмӣ ба Покистон бо фармондеҳони баландпояи неруҳои мусаллаҳи ин кишвар мулоқот кард ва ду ҷониб ба тақвияти ҳамкорӣ дар самтҳои амниятӣ, дифоӣ ва мубориза бо терроризм таъкид намуданд.

Генерал Собирзода Имомалӣ Абдураҳим дар ҷараёни боздиди расмӣ аз Исломобод бо генерал Соҳир Шамшод Мирзо, раиси Кумитаи ситоди муштараки артиши Покистон фелдмаршал Сайид Осим Мунир, фармондеҳи артиши Покистон ва Хоҷа Муҳаммад Осиф, вазири дифои ин кишвар мулоқот намуд.

Дафтари матбуоти артиши Покистон дар изҳороти расмӣ хабар дод, ки дар мулоқоти генерал Абдураҳим бо фелдмаршал Мунир масъалаҳои муҳимми дорои манфиати муштарак, аз ҷумла амнияти минтақавӣ ва ҳамкориҳои дифоии дуҷониба, баррасӣ шудаанд. Ҷонибҳо ба зарурати рушди ҳамкориҳои мавҷуд, бахусус дар бахшҳои омӯзиш, амнияти минтақа, дифоъ ва мубориза бо терроризм ба иттифоқ афтодаанд.

Ҳамчунин, дар мулоқоти вазирони дифои ду кишвар Хоҷа Муҳаммад Осиф гуфт, ки Покистон ба ҳалли осоиштаи масъалаҳои минтақа бовар дорад ва талошҳои Тоҷикистон дар таҳкими сулҳу субот дар минтақаро қадрдонӣ мекунад.

Вазири дифои Покистон таъкид кард, ки Ислобод ба густариши сулҳу субот ва ҳамкорӣ дар минтақа, хусусан бо кишварҳои Осиёи Марказӣ содиқ боқӣ мемонад.

Dialog.tj