Роҳи мошингарди Исфара–Чоркуҳ–Ворух, ки дар паи муноқишаҳои марзӣ чанд сол боз баста буд, бо иштироки Раиси вилояти Суғд Раҷаб Аҳмадзода ва Раиси вилояти Ботканди Ҷумҳурии Қирғизистон Айбек Шаменов, дубора боз гардид.

Дар ин бора хадамоти матбуоти раиси вилояти Суғд хабар медиҳад.

Бо сабаби баста будани ин қитъаи роҳ сокинони деҳоти Ворух ва Чоркуҳ тавассути деҳаи Чорбоғ ба самти шаҳри Исфара ҳаракат мекарданд. Акнун, бо боз шудани роҳ масофа тақрибан як километр кӯтоҳ гардида, рафтуомади сокинон осонтар шуд.

Зимни мулоқот бо сокинон ва намояндагони мақомоти ҳифзи ҳуқуқ Раиси вилояти Суғд Раҷаб Аҳмадзода ва Раиси вилояти Ботканд Айбек Шаменов аз аҳамияти таҳкими ҳамкориҳо дар ҳамаи самтҳо ёдовар шуда, таъкид доштанд, ки ҳамзистии дӯстонаи аҳолии наздимарзӣ заминаи муҳим барои рушди минбаъдаи робитаҳо мебошад.

Бо итминон зикр гардид, ки амалӣ шудани чунин иқдомҳо ба таҳкими ҳамкориҳои иқтисодиву иҷтимоӣ ва фарҳангии Тоҷикистону Қирғизистон мусоидат намуда, ба манфиати ҳар ду халқи бародар хоҳад буд.

Dialog.tj