Сарчашмаҳои огоҳ ба рӯзномаи Financial Times гуфтаанд, ки мулоқоти ду рӯзи пеши президентҳои ИМА ва Украина дар Кохи сафед бо таниш сурат гирифт. Ба гуфтаи онҳо, дар ҷараёни ин нишаст баҳсу мунозираҳои шадид миёни Доналд Трамп ва Владимир Зеленский рӯй дода, Доналд Трамп “мудом дашном медод”.

Тибқи навиштаи ин манобеъ, Доналд Трамп аз Зеленский талаб намудааст, ки шартҳои Русияро барои поён додан ба ҷанг бипазирад ва бо истинод ба суханони президенти Русия ҳушдор додааст, ки агар Украина бо Маскав созиш накунад, “Русия онро нобуд хоҳад кард”.

Гуфта мешавад, ки Доналд Трамп харитаи вазъи неру ва ҷабҳаҳоро, ки аз сӯи Владимир Зеленский пешниҳод гардида буд, ба як сӯ партофта, исрор доштааст, ки Зеленский ҳамаи минтақаи Донбасро дар шарқи Украина ба Путин таслим кунад. Ӯ чандин маротиба нуқтаҳоеро такрор намудааст, ки қаблан дар тамоси телефонӣ аз Путин шунида буд.

Dialog.tj