Владимир Путин, президенти Русия, хабар дод, ки Бенямин Нетаняҳу, сарвазири Исроил аз Маскав хостааст ба Эрон паёмҳое ирсол кунад, ки дар онҳо Исроил ба ҳаллу фасли дипломатӣ ва созишомези масъалаҳо бо ин кишвар ваъда медиҳад.

Ба гуфтаи хабаргузории давлатии Русия, Владимир Путин рӯзи панҷшанбе, 9-уми октябр, дар дуюмин нишасти “Осиёи Марказӣ – Русия”, ки дар шаҳри Душанбе, пойтахти Тоҷикистон, баргузор шуд, дар бораи тамоси охираш бо Бенямин Нетаняҳу гуфт: “Мо паёмҳое гирифтем, ки онҳоро бояд ба дӯстони эронӣ расонем. Дар ин паёмҳо таъкид шудааст, ки Исроил ба ҳалли дипломатӣ ва созишомези масъалаҳо содиқ аст ва ба ягон намуди бархӯрд майл надорад”.

Путин илова кард, ки Русия ба тамосҳои боэътимод бо Исроил идома медиҳад.

Президент пештар низ дар тамоси телефонӣ бо сарвазири Исроил таваҷҷуҳ ва хоҳиши худро барои пайдо кардани роҳҳои ҳалли дипломатӣ дар доираи музокирот дар масъалаи ҳастаии Эрон таъкид карда буд.

Владимир Путин инчунин, ба дидори охираш бо Рафаэл Гросси, директори генералии Созмони байналмилалии энергетикаи ҳастаӣ дар Маскав ишора кард ва гуфт: “Дар ин дидор мо муфассал дар бораи масъалаи ҳастаии Эрон гуфтушунид кардем ва Гросси ба ваъдаи Эрон барои ҳалли ҳамаи масъалаҳо ишора кард”.

Путин афзуд, ки масъалаҳои техникӣ ҳанӯз боқӣ мондаанд, аммо бо иҷрои созишҳои мавҷуда, расидан ба созиши ниҳоӣ дар бораи ин масъалаи мураккаби минтақавӣ имконпазир хоҳад буд.

Dialog.tj