Тавре ки АМИТ «Ховар» бо такя ба маълумоти Вазорати маориф ва илми Ҷумҳурии Тоҷикистон хабар медиҳад, соли ҷорӣ Русия  ба муассисаҳои таҳсилоти миёнаи умумии Тоҷикистон 800 ҳазор нусха китоби дарсии забони русӣ фиристад.

Иттилоъ дода мешавад, ки иқдоми мазкур дар асоси Созишномаи дуҷониба байни Вазорати маориф ва илми Ҷумҳурии Тоҷикистон ва Вазорати маорифи Федератсияи Русия амалӣ карда мешавад.

"Ин китобҳо, ки барои синфҳои 3-4 пешбинӣ шудаанд, аз ҷониби нашриёти маъруфи русии «Просвещение» таҳия ва ба табъ расонида мешаванд. Ҳадафи асосӣ аз интиқоли ин китобҳо мусоидат ба баланд бардоштани сатҳи омӯзиши забони русӣ дар зинаҳои ибтидоии таҳсилот ва таъмини муассисаҳои таълимӣ бо маводи дарсии замонавӣ мебошад", - зикр мегардад дар иттилоия.

Афзуда мешавад, ки то ҳол зиёда аз 118 ҳазор нусха аз шумораи умумии китобҳо ворид гардидааст. Қисми боқимондаи китобҳо дар марҳилаи чоп қарор дошта, пас аз анҷоми чоп тибқи нақша дастрас карда мешаванд.

Ба қавли манбаъ, китобҳои дарсӣ ба муҳити иҷтимоӣ, фарҳангӣ ва таълимии Тоҷикистон мутобиқ гардонида шуда, барои истифода дар ҳама мактабҳои таҳсилоти умумии мамлакат, ки дар онҳо омӯзиши забони русӣ ба роҳ монда шудааст, равон шудаанд.

Dialog.tj