Баъди нашри чанд акс дар шабакаҳои иҷтимоӣ, ки корбарон онро лаҳзаи узрхоҳии телефонии сарвазири режими Исроил аз ҳамтои қатарияш дар ҷараёни мулоқот бо президенти Амрико донистанд, суолҳову нофаҳмиҳое матраҳ шуд.

Рӯзномаи “Индия тудей” (“India Today”) дар гузориш ба аксҳои нашршуда аз Бенямин Нетаняҳу, сарвазири режими саҳюнистӣ ва Доналд Трамп, президенти Амрико дар дафтари доирашакли Кохи сафед ишора намудааст. Дар ин аксҳо дида мешавад, ки Бенямин Нетаняҳу машғули як гуфтугӯи телефонӣ мебошад. Расонаҳо иддо намуданд, ки ӯ аз Шайх Муҳаммад ибни Абдурраҳмон Оли Сонӣ, сарвазири Қатар барои ҳамлаи ахири Тел-Авив ба маҳалли иқомати мақомоти Ҳамос дар Давҳа узрхоҳӣ кардааст.

“Индия Тудей” бо ишора ба яке аз аксҳо, ки Нетаняҳуро бо як матн дар даст дар вақти гуфтугӯ нишон медиҳад, навишт: “Оё Нетаняҳу дар вақти узрхоҳӣ аз Қатар аз рӯи матн мехонад?”.

Ин суол баъд аз он ки Кохи сафед як акси сиёҳу сафедро нашр кард, ба мавзуи гарм табдил шуд. Дар он акс Доналд Трамп дар даст телефон дорад ва Бенямин Нетаняҳу ба назар мерасад, аз рӯи коғаз чизе мехонад.

Ин акс рӯзи душанбе дар дафтари базавии Кохи сафед гирифта шуда, гӯё лаҳзаи тамоси телефонии Бенямин Нетаняҳу бо сарвазири Қатарро сабт кардааст. Ба гуфтаи сарчашмаҳо, ин тамос аз сӯи Доналд Трамп ва дар ҷараёни дидораш бо Бенямин Нетаняҳу роҳандозӣ шуд. Бенямин Нетаняҳу дар ин гуфтугӯ барои дастур додани ҳамла ба роҳбарони Ҳамос дар Давҳа узрхоҳӣ намудааст.

Тибқи ин гузориш, Доналд Трамп дар аввал иддао дошта, ки аз ҳамла хабар надоштааст ва аз иқдоми якҷонибаи Нетаняҳу хашмгин шуда ва дар як гуфтугӯи шадиди  телефонӣ ин ҳамларо “ғайриоқилона” номидааст ва ҳушдор додааст, ки чунин амалҳо метавонад дипломатияи ҳассоси минтақаро ноустувор созад.

Қатар, ки нақши асосиро дар миёнҷигарии гуфтугӯҳои оташбаси Ғазза иҷро мекунад, ин ҳамларо “буздилона” ва нақзи ошкори ҳуқуқи байналмилалӣ номида, маҳкум кард. Бенямин Нетаняҳу баъди ин ҳамла таъкид кард, ки Исроил масъулияти комили он рӯйдодро мепазирад.

Dialog.tj