26-уми сентябр бо ҳузури Президенти Тоҷикистон муҳтарам Эмомалӣ Раҳмон бинои нави шуъбаи Кумитаи давлатии амнияти миллӣ (КДАМ) дар шаҳри Ваҳдат мавриди истифода қарор гирифт.

Иншооти чорошёна бо таҳхона дорои ҳуҷраҳои корӣ, китобхона, маҷлисгоҳ барои 40 нафар, толори варзишӣ, ошхона ва ҳуҷраи бойгонӣ мебошад. Ба гуфтаи мақомот, шароити муосир барои фаъолияти кормандон дар ин бино фароҳам оварда шудааст.

Дар маросим ҳамзамон калиди манзилҳои нави истиқоматӣ ба кормандони КДАМ дар Ваҳдат супурда шуд. Президенти кишвар таъкид намуданд, ки “дар шароити зудтағйирёбандаи ҷаҳони муосир, ҳифзи амнияти миллӣ ва таъмини оромию субот” яке аз ҳадафҳои асосии давлат мебошад. Пешвои миллат кормандони мақомоти амниятиро ба иҷрои содиқонаи масъулият ва хизмат ба нафъи ҷомеа вазифадор карданд.

Бинои нави хизматӣ бо инфрасохтори ёрирасон, чароғон ва сабзкорӣ иҳота шуда, барои кормандон шароити беҳтари кориву зиндагӣ муҳайё месозад.

Dialog.tj