Рӯзномаи русии “Независимая газета” дар гузориши нави худ навишт, ки Вазорати дифои гурӯҳи террористии Толибон даъвати ғайриинтизори Пекинро дарёфт кардааст.

Тибқи ин гузориш Чин аз Муҳаммад Яъқуб иҷрокунандаи вазифаи вазири дифои гурӯҳи террористии Толибон хостааст ба зудӣ ба Пекин сафар кунад.

Ба гуфтаи Андрей Сиренко, муаллифи гузориш, ин даъват эҳтимол ба изҳороти ахири Доналд Трамп, Президенти Иёлоти Муттаҳидаи Амрико рабт дошта бошад. Трамп гуфта буд, ки ният дорад Пойгоҳи ҳавоии Багром дар вилояти Парвони Афғонистонро дубора зери назорати Вашингтон қарор диҳад.

Сарчашмаҳое аз Афғонистон, ки бо намояндагони Иёлоти Муттаҳидаи Амрико мулоқот доштанд, ба “Независимия газета” хабар додаанд, ки стратегияҳои нави Доналд Трамп нисбат ба Афғонистон ба интихоботи миёнамуҳлати Конгресси Амрико иртибот дорад. Ба гуфтаи онҳо, Трамп мехоҳад то пеш аз интихобот як пирӯзии рамзиро дар Афғонистон ба даст орад. Боло бурдани дубораи парчами Амрико дар Багром меҳвари асосии ин нақша арзёбӣ шудааст.

Гузориш меафзояд, ки фиристодагони Амрико чанд моҳ боз бо роҳбарони Толибон ва сиёсатмадорони муҳоҷири афғон дар иртибот қарор доранд. Гуфта мешавад, бархе аз мусъулони Толибон аз ин нақша ҳимоят кардаанд, аммо роҳбарияти гурӯҳ, бахусус Ҳайбатуллоҳ Охундзода ба бозгашти амрикоиҳо мухолиф аст.

Ҳамчунин, “Независимая газета” менависад, ки Вашингтон дар баробари гуфтушунидҳо барои як амалиёти вижаи низомӣ дар Афғонистон низ омодагӣ мебинад. Ҳатто эҳтимоли истифодаи ҳазорон сарбози амрикоӣ ва шумори зиёди низомиёни пешини Афғонистон, ки дар хориҷ иқомат доранд, матраҳ шудааст.

Бар асоси ин гузориш Пекин мехоҳад бо даъвати Мулло Яъқуб қудрати воқеии неруҳои Толибон ва иродаи онҳо барои муқобила бо як амалиёти эҳтимолии Амрикоро арзёбӣ кунад. Бо вуҷуди ин, ҳанӯз маълум нест, ки оё роҳбари Толибон ба сафари Яъқуб ба Чин ризоият хоҳад дод ё на.

“Независимия газета” яке аз аввалин расонаҳои мустақил баъд аз фурӯпошии Иттиҳоди Шӯравӣ буда, бо роҳбарии рӯзноманигори рус Виталий Третяков ба нашр мерасад.

Dialog.tj