Ҷумҳурии Тоҷикистон содироти маҳсулоти кишоварзӣ, аз ҷумла ангурро ба бозорҳои мухталифи ҷаҳон ва Федератсияи Русия идома медиҳад.

Тибқи иттилои хабаргузории давлатии “Ховар” дар ин мавсим ҳаҷми содироти ангур афзоиш ёфта, фақат дар моҳи сентябр даҳҳо тонна ангури баландсифат аз боғҳои Тоҷикистон ба Русия, аз ҷулма ба вилояти Пенза интиқол дода шудааст.

Меваҳои тоҷикӣ, махсусан ангур, дар шаҳрҳои мухталифи Федератсияи Русия, аз ҷумла Пенза талаботи баланд доранд. Ангури содиротӣ бо риояи меъёрҳои байналмилалии тозагӣ ва сифати ғизо дар банду басти махсус ва ба воситаи нақлиёти яхдондор ба истеъмолкунандагон мерасад.

Ин иқдом на фақат барои таъмини бозорҳои хориҷӣ бо маҳсулоти тару тоза, балки барои дастгирии боғдорон ва рушди иқтисоди содиротии кишвар амалӣ мегардад.

Ҳамкориҳои мутақобилан судманд дар соҳаи хариду фурӯши маҳсулоти кишоварзӣ сол то сол густариш меёбанд. Ҷонибҳо омодагии худро иброз намуданд, ки ҳаҷми содироти ангур ва дигар маваҷоти Тоҷикистон ба бозорҳои Русия дар оянда низ афзоиш хоҳад ёфт.

Ба гуфтаи коршиносон иқлими мусоиди Тоҷикистон ва таҷрибаи бойи боғпарварони маҳаллӣ барои парвариши ангури хушсифат заминаи мусоид фароҳам кардааст. Ин омилҳо имкон медиҳад, ки ангури Тоҷикистон дар бозорҳои байналмилалӣ рақобатпазир боқӣ монад.

Dialog.tj