Вазири энергетика ва захираҳои оби Ҷумҳурии Тоҷикистон Далер Ҷумъа бо роҳбари Дафтари ҳамкории Швейтсария дар Тоҷикистон Дениз Люти мулоқот намуда, масоили ҳамкориҳои дуҷонибаро баррасӣ намуданд.

Ду ҷониб дар ин мулоқот, ки ҳафтаи гузашта дар шаҳри Душанбе доир гашт, масъалаи рушди ҳамкориҳои дуҷониба дар бахши идоракунии захираҳои обии кишварро баррасӣ карданд.

Дар ҷараёни мулоқот ҷонибҳо оид ба амалӣ намудани лоиҳаҳои ҷорӣ ва имкониятҳои ташаббусҳои нави муштарак табодули афкор карда, ба таҳкими иқтидори энергетикии кишвар ва таъмини устувори обрасонӣ таъкид намуданд.

Дениз Люти омодагии Швейтсарияро барои идомаи ҳимояти лоиҳаҳои амалишаванда ва рушди барномаҳои нави ҳамкорӣ таъкид намуд. Далер Ҷумъа, вазири энергетика ва захираҳои оби Ҷумҳурии Тоҷикистон аҳамияти чунин ташаббусҳоро дар баланд бардоштани самаранокии идоракунии захираҳои обӣ ва таҳкими амнияти энергетикии кишвар муҳим арзёбӣ карданд.

Ҷонибҳо дар ҷараёни мулоқот  барои идомаи муколамаи созанда ва густариши ҳамкорӣ дар чорчӯби барномаҳои рушди устувор ирода намуда, ба аҳамияти стратегии шарикии дуҷониба дар соҳаи энергетика ва захираҳои об таъкид намуданд.

Dialog.tj