Президенти Федератсияи Русия Владимир Путин, Президенди Ҷумҳурии Исломии Эрон Масъуд Пизишкиён, роҳбари Кореяи Шимолӣ Ким Чин Ин барои ширкат дар роҳпаймоии низомӣ ба ифтихори рӯзи пирӯзии Чин бар Ҷопон дар Ҷанги ҷаҳонии дувум ба Пекин сафар мекунанд.

Рейтерз бо нашри ин хабар навишт, ки ин аввалин намоиши Путин, Ким Чин Ин ва Си Ҷинпин аст, ки дар замони фишорҳои Ғарб баргузор мешавад.

Дар ин маросим, ки ба муносибати 79-умин солгарди таслими расмии Ҷопон доир мешавад, шуморе аз роҳбарони кишварҳои дигар, аз ҷумла Александр Лукашенко, Президенти Беларусия, Прабова Субианто, Президенти Индонезия, Александр Вучич, Президенти Сербия ва президентҳои бархе кишварҳои Осиёи Марказӣ ва ҳамчунин, намояндагони СММ ширкат мекунанд.

Вазорати корҳои хориҷии Чин эълон намуд, ки аз миёни роҳбарони кишварҳои ғарбӣ фақат Роберт Фико, сарвазири Словакия дар ин маросим ҳузур хоҳад дошт.

Русия, ки Чинро шарики стратегии худ медонад, баъди ҳамла ба Украина дар соли 2022 зери таҳримҳои густурдаи Ғарб қарор гирифт. Бо вуҷуди ин иқтисоди кишвар, ба гуфтаи мақомот “зарбаи ҳалоккунанда” нахӯрдааст. Путин, ки суди Гаага бар зидди ӯ қарори боздошт содир намудааст, дар соли 2024 низ ба Чин сафар карда буд.

Маросими имсола яке аз бузургтарин раҳпаймоиҳои низомии Чин дар солҳои ахир ба шумор меравад ва қарор аст техникаҳои пешрафтаи ҷангӣ, аз ҷумла ҳавопаймоҳои ҷангӣ, системаҳои дифоӣ ва силоҳҳои нав ба намоиш гузошта шавад.

Dialog.tj