Президенти Озарбойҷон Илҳом Алиев дар суҳбати телевизиони “Ал-Арабия” гуфт, ки дар соли 1920 артиши русӣ ба Ҷумҳурии Озарбойҷон ворид шуда, ин кишварро ишғол намуд.

“Болшевиконе, ки соли 1917 инқилоб карданд, мардумро фиреб доданд. Шиорҳои онҳо ин буд: “фабрикаҳо ба коргарон, замин ба деҳқон, озодӣ ба ҳалқҳо”. Мо давлати худро таъсис дода будем, аммо болшевикон онро аз дастамон гирифтанд”- зикр кард Илҳом Алиев.

Ӯ дар посух ба суоли калидори Зангузӯр ва оғози низоъ бо Арманистон гуфт, ки Боку ҳамеша аз тамомияти арзии кишварҳо ҳимоят мекунад: “Аз рӯзи нахустини ҳамлаи Русия ба Украина мо мавқеи ҷонибдории тамомияти арзии ин кишварро доштем ва ҳоло ҳам дорем”- таъкид кард Илҳом Алиев.

Президенти Ҷумҳурии Озарбойҷон ба низои афзоянда бо Русия ишора карда, гуфт, ки Озарбойҷон ҳамеша “қонунӣ ва созанда” амал мекунад, вале “ҳич гоҳ тавоҷуҳ ва беҳурматиро таҳаммул нахоҳад кард”.

Ӯ қазияи бародарон Сафаровҳоро мисол овард, ки дар июни соли 2025 дар Екатеринбург дар вақти амалиёти ниҳодҳои қудратии Русия кушта шуданд.

“Ду нафар шиканҷа ва кушта шуданд. Расман гуфтанд, ки онҳо аз сактаи дил фавтиданд. Вале ҳатто агар ҷиноят ҳам карда бошанд, бо одам чунин рафтор намекунанд. Ин як амали бесобиқа бар зидди мардуми мо буд”- гуфт Илҳом Алиев.

Бар асоси хулосаи мутахассисони озарбойҷонӣ шикасти қабурға, хунрезии зиёд ва лат хӯрдани паҳлуҳои ҷасади онҳо ошкор шудааст.

Ин ҳодиса дар ҷараёни рейди густурдаи мақомоти амниятии Русия нисбати даҳҳо нафар озарбойҷонӣ, ки онҳо дар кушторҳои солҳои 2001 -2011 айбдор мешуданд, рӯй дод.

Dialog.tj