“Афзалияти стратегӣ”: Эрон ба густариши равобит бо Тоҷикистон пойбанд аст

Вазири корҳои хориҷии Ҷумҳурии Исломии Эрон Аббос Ироқчӣ таъкид кард, ки густариши равобит бо Душанбе аз афзалиятҳои стратегии сиёсати хориҷии Эрон мебошад.

Сайид Аббос Ироқчӣ ин суханонро рӯзи чоршанбе дар мулоқот бо Президенти Ҷумҳурии Тоҷикистон муҳтарам Эмомалӣ Раҳмон дар Қасри миллат иброз дошт.

Президенти Ҷумҳурии Тоҷикистон муҳтарам Эмомалӣ Раҳмон аз ташрифи Вазири корҳои хориҷии Эрон истиқбол намуда, равобити Тоҷикистону Эронро решадор дар дӯстии чандинасра ва эҳтироми мутақобил арзёбӣ кард. Ӯ ба зарурати тақвияти бештари ҳамкорӣ дар партави чолишҳои ҷорӣ дар минтақа таъкид намуд.

Сайид Аббос Ироқчӣ ба робитаҳои муштараки забонӣ, фарҳангӣ ва таърихии ду кишвар ишора намуда, онҳоро пояи устувори рушди ҳамкорӣ дар соҳаҳои муҳимми тиҷорат, дипломатия, маориф ва табодули фарҳангӣ номид.

Дар ҷараёни мулоқот дипломати эронӣ паёми расмии Пешвои Инқилоби Исломӣ Оятуллоҳ Сайид Алии Хоманаӣ ва Президенти Ҷумҳури Исломии Эрон Масъуд Пизишкиёнро ба роҳбарияти Тоҷикистон ва мардуми тоҷик расонд.

Дар ин мулоқот ҷонибҳо вазъи кунунии робитаҳои дуҷонибаро мавриди баррасӣ қарор дода, роҷеъ ба густариши ҳамкорӣ ва таҳаввулоти минтақавӣ, аз ҷумла Қафқоз, Осиёи Марказӣ, Афғонистон ва Ғарби Осиё табодули назар карданд ва нигарониҳои муштарак дар бахши амниятро баён доштанд.

Мулоқоти Ироқчӣ бо Сироҷиддин Муҳриддин

Баъдтар дар ҳамон рӯз Сайид Аббос Ироқчӣ бо ҳамтои тоҷики худ Сироҷиддин Муҳриддин, вазири корҳои хориҷии Тоҷикистон дидор ва гуфтугӯ анҷом дод. Ин гуфтугӯ ба масъалаҳои сиёсӣ, иқтисодӣ, тиҷоратӣ, илмӣ, сайёҳӣ ва консулгарии ду кишвар иртибот дошт.

Ҳарду вазир муҳим будани тақвияти ҳамкориҳои бахши хусусӣ ва ҷомеаи шаҳрвандии ду кишварро таъкид карданд. Онҳо, ҳамчунин, рӯйдодҳои минтақавӣ ва байналмилалиро, аз ҷумла вазъи нигаронкунандаи башардӯстона дар Ғазза ва Афғонистонро баррасӣ карданд.

Сайид Аббос Ироқчӣ аз ҳукумати Тоҷикистон барои мавқеи рӯшани он дар маҳкум кардани ҳамлаҳои низомӣ бар зидди Эрон изҳори сипос кард. Ӯ режими Исроилро барои поймолсозии такрории ҳуқуқи байналмилалӣ, ҷиноятҳои ҷангӣ ва амалҳои наслкушӣ дар Фаластини ишғолшуда маҳкум карда, аз ҷомеаи байналмилал ва кишварҳои исломӣ даъват ба амал овард, ки барои дифоъ аз мардуми Фаластин иқдоми муштарак ва муассир анҷом диҳанд.

Вазири корҳои хориҷии Тоҷикистон Сироҷиддин Муҳриддин низ аз иродаи сиёсӣ ва омодагии кишвараш барои таҳкими равобит бо Эрон изҳори хушнудӣ карда, зарурати ҳамкории бештар дар бахши иқтисод ва тиҷоратро таъкид намуд. Ӯ иродаи муштараки роҳбарони ду кишварро барои рушди ҳамгироӣ дар ҳама соҳаҳо мусбат арзёбӣ намуд.

Ҷонибҳо, ҳамчунин, ба зарурати тақвияти ҳамоҳангӣ дар созмонҳои байналмилалӣ, аз ҷумла Созмони Милали Муттаҳид таъкид карда, дар бораи ҳифзи мероси муштараки тамаддунӣ, фарҳангӣ ва забонӣ ва пуштибонии мутақобил дар созмонҳои бисёрҷониба иттифоқи назар доштанд.

Ҳамкории фарҳангӣ дар маркази гуфтугӯҳои Эрон ва Тоҷикистон

Дар канори ин сафари дипломатӣ сухангӯи Вазорати корҳои хориҷии Эрон Исмоил Бақоӣ бо вазири фарҳанги Тоҷикистон Матлубахон Сатторӣ дидор кард.

Дар ин мулоқот, ки бо ҳузури Шоҳин Самадӣ, сухангӯи Вазорати корҳои хориҷии Тоҷикистон доир шуд, ҷонибҳо дар бораи густариши ҳамкории фарҳангӣ ба воситаи рушди забони форсӣ, нашри китобҳо, табодули ҳайатҳо дар бахшҳои фарҳанг, санъат ва ВАО, ҳамчунин, барномаҳои муштарак дар бахшҳои синамо, мусиқӣ ва театр табодули назар карданд.

Мақомот ба аҳамияти баргузории ҳафтаи фарҳангии Эрону Тоҷикистон, ки барои тирамоҳи имсол ба нақша гирифта шудааст, ишора карда, онро фурсати муҳим барои ба намоиш гузоштани мероси муштараки фарҳангӣ ва таҳкими робитаҳои мардумӣ донистанд.

Сайид Аббос Ироқчӣ субҳи рӯзи чоршанбе бо ҳамроҳии сафири Тоҷикистон дар Эрон Низомиддин Зоҳидӣ аз Теҳрон озими Душанбе шуд.

Эрон ва Тоҷикистон робитаҳои амиқи фарҳангӣ, забонӣ ва таърихӣ доранд. Дар солҳои ахир, ду кишвар ҳамкориҳои дуҷонибаи худро дар бахшҳои мухталиф тақвият мебахшанд.  Аз ҷумла, 13-уми июни соли 2022 Форуми сайёҳии Тоҷикистон ва Эрон доир гашта буд, ки ҳадафаш таҳкими ҳамкориҳо дар бахши туризм буд.

Ҳамчунин, 21-уми июни соли 2022 дар шаҳри Душанбе ҷаласаи гурӯҳи муштараки амнияти ду кишвар доир гардид, ки дар он намояндагони вазоратҳои корҳои дохилии Эрон ва Тоҷикистон ширкат доштанд. Ҳадафи ин ташаббуси муштараки амниятӣ ҳамоҳангсозии талошҳо бар зидди терроризм, ҷиноятҳои муташаккил ва қочоқи маводи мухаддир буд, ки масъалаҳои амниятии муштаракро ҳадаф қарор медиҳад.

Dialog.tj