Ҳамраисони Комиссияи байниҳукуматии Тоҷикистон ва Беларусия дар шаҳри Душанбе равобити дуҷонибаро баррасӣ намуданд. Ин мулоқот дар ҳошияи Машварати 10-уми вазирони корҳои хориҷии кишварҳои аъзои Созмони ҳамкории Шанхай дар шаҳри Душанбе доир гардид.

Дар ҷараёни ин мулоқот Қурбон Ҳакимзода, Вазири кишоварзии Ҷумҳурии Тоҷикистон ва Юрий Горлов, Вазири кишоварзии Ҷумҳурии Беларусия масъалаҳои густариши ҳамкориҳои дуҷонибаро мавриди арзёбӣ қарор доданд.

Тибқи иттилои Вазорати кишоварзии Тоҷикистон дар ҷараёни мулоқот ду ҷониб омодагӣ ба ҷаласаи 18-уми Комиссияи байниҳукуматӣ оид ба ҳамкории тиҷоратию иқтисодӣ ва ҷаласаи 37-уми вазирони кишоварзии кишварҳои Иттиҳоди Давлатҳои Мустақил, ки баргузории он аз 17 то 20-уми сентябри соли 2025 дар шаҳри Душанбе пешбинӣ шудааст, мавриди гуфтугӯ қарор доданд.

Дар ин мулоқот масъалаҳои муҳимми ҳамкорӣ, аз ҷумла бунёди корхонаҳои коркарди ширу гӯшт, воридоти чорвои хушзоти гӯштию ширӣ, афзоиши содироти хушкмева ба базори Беларусия, таҳкими иқтидори корхонаи “Агротехсервис” –и Ҳисор дар васлу ҷамъ намудани техникаҳои кишоварзӣ, таъсиси корхонаҳои коркарди меваю сабзавот ва густариши ҳамкорӣ дар соҳаи маориф, кишоварзӣ, боғу токпарварӣ ва мубориза бо ҳашароти заррарасон баррасӣ гардиданд.

Дар назар аст, дар ҷаласаи 18-уми Комиссияи байниҳукуматӣ шумораи бештари доираҳои соҳибкорӣ ширкат кунанд ва як зумра созишҳои дуҷониба ба хотири афзоиши ҳаҷми гардиши мол миёни ду кишвар ба имзо расанд.

Dialog.tj