Валерий Семериков, муовини Дабири кулли Созмони аҳдномаи амнияти Дастаҷамъӣ (СААД) бори дигар ба зарурати таҳкими амният дар марзи Афғонистон ва Тоҷикистон таъкид намуд.

Ӯ рӯзи панҷшанбе, 17-уми июл дар як конфронси байналмилалӣ таҳти унвони “Мубориза бо терроризми байналмилалӣ”, ки дар Пажӯҳишгоҳи таҳқиқоти стратегии Русия доир шуд, суханронӣ намуд.

Валерий Семериков дар суханронии худ афзуд, ки барои муқовимат бо терроризм, қочоқи маводи мухаддир ва ифротгароии динӣ тадбирҳои ҷиддӣ роҳандозӣ шудаанд ва дар ин самт ҳамкории бештари ҷомеаи байналмилал зарур мебошад. Ба гуфтаи ӯ, таҳкими амнияти марзи Тоҷикистон ва Афғонистон, ки феълан таҳти назорати режими Толибон қарор дорад, ба ҳайси як ҳадафи муҳимми СААД ва Созмони ҳамкории Шанхай арзёбӣ мешавад.

Таъкидҳои муовини роҳбари СААД дар ҳолест, ки Тоҷикистон дар чанд соли ахир пайваста аз таҳдидҳои эҳтимолӣ аз ҷониби Афғонистон, бахусус бо ҳузури гурӯҳҳои тундгаро ва қочоқбар дар минтақаҳои марзӣ изҳори нигаронӣ мекунад. Таҳлилгарон дар ин нишаст гуфтаанд, бо таваҷҷуҳ ба фаъол гардидани гурӯҳҳои шубҳанок дар марзи ҷанубии кишварҳои Осиёи Марказӣ, ҳамоҳангсозии сиёсати амниятӣ ва назорати муштарак ба марзҳо, бахусус миёни Тоҷикистону Афғонистон бештар аз ҳар вақти дигар аҳамият пайдо кардааст.

Dialog.TJ