Пажӯҳиши нави илмӣ нишон медиҳад, ки истифодаи доимии доруи габапентин метавонад боиси ноқисии ақл шавад. Ин таҳқиқоти нав дар маҷаллаи байналмилалии "Regional Anesthesia & Pain Medicine" нашр шудааст ва дар он нишон дода мешавад, доруи Габапентин, ки барои муолиҷаи дарди музмини миён истифода мешавад, метавонад боиси ноқисии ақл гардад.

Олимон натиҷаи парвандаҳои тиббии беш аз 52 ҳазор беморро таҳлил кардаанд. Аз миёни онҳо, касоне, ки шаш маротиба ё бештар дорухати габапентин гирифтаанд, дар давоми даҳ сол 29 фоиз бештар ба ноқисии ақл (деменсия) ва 85 фоиз бештар ба ихтилоли сабуки шиносоӣ гирифтор шудаанд. Хатар барои гурӯҳҳои синнӣ, ки қаблан дар маърази чунин бемориҳо қарор надоштанд, нигаронкунанда арзёбӣ гардид. Аз ҷумла дар миёни шахсони аз 35 то 49 сола, эҳтимоли гирифторӣ ба деменсия дучанд ва ба ихтилоли зеҳн се баробар зиёд будааст.

“Мо вобастагии рӯшанро мушоҳида кардем. Чӣ қадаре, ки дози габапентин бештар таъйин мешуд, ҳамон андоза хавфҳои шинохтии зеҳнӣ бештар мешуданд”- зикр шудааст дар таҳқиқоти олимон. Таҳқиқот, ки бо истифода аз шабакаи TriNetX (аз 60 муассисаи тиббии ИМА) анҷом шудааст, хусусияти мушоҳидавӣ дошта, сабаби мустақими таъсири габапентин ба хотираро тасдиқ намекунад, вале тамоюлҳо, ба гуфтаи муаллифони таҳқиқот “ҷиддӣ ва нигаронкунанда” аст. Габапентин ибтидо барои табобати бемории эпилепсия ихтироъ шуда буд, аммо солҳои охир онро ба ҳайси ивазкунандаи мулоимтари опоидҳо дар табобати дарди музмин, фибромиалгия ва ҳатто ихтилоли изтироб истифода мебаранд.

Олимон мегӯянд, ки таъсири он ба каналҳои калсийи нейронҳо метавонад дар дарозмуддат кори майнаро зери хатар гузорад, хусусан дар шахсони синни миёна, ки солҳои тӯлонӣ онро истифода мебаранд. Бо вуҷуди ин, муаллифони таҳқиқот таъкид мекунанд, ки ин натиҷаҳо бояд боиси тарки комили терапеияи габапентин нашаванд, аммо зарурати бознигарии равишҳои табобат, аз ҷумла назорати доимии қобилиятҳои зеҳниро тақозо менамояд.

Dialog.TJ