Рӯзномаи амрикоии "Ҳилл" ("The Hill") дар таҳлиле ба тавони мушакии Эрон пардохта, навиштааст, ки Эрон аз марҳилаи сохтану озмоиши мушак ба марҳилаи истеҳсолоти саноатӣ расидааст.

Ин рӯзнома бо такя ба Вазорати корҳои хориҷии Исроил тасдиқ кард, ки Барномаи мушакии Ҷумҳурии Исломии Эрон аз марҳилаи озмоиш ва рушди техникӣ гузашта, ба марҳилаи истеҳсоли саноатӣ ворид гардидааст. Ба гуфтаи мақомоти исроилӣ Эрон ҳоло дар роҳи табдил шудан ба бузургтарин истеҳсолкунандаи мушак дар ҷаҳон қарор дорад.

Тибқи арзёбии ин рӯзнома “мушакҳои дурпарвози Эрон метавонад мавҷудияти Исроилро таҳдид кунад”. Ин рӯзнома афзудааст, ки Эрон дар ҳоли сохтани як захираи бузурги мушакҳои балластикӣ аст, ки тавоноии вайронгарии он метавонад бо бомбаи атомӣ баробар ё ҳатто бештар бошад.

Бо вуҷуди ҳамлаи ҳавоии Исроил ба корхонаи тавлиди сӯзишвории сохти мушакии Эрон дар моҳи октябри соли 2024, ки ҳадафаш коҳиши суръати ин барнома буд, иттилоъ нишон медиҳад, ки ин иқдом натиҷаи баръакс додааст. Ҷумҳурии Исломӣ пас аз ин ҳамла суръати тавлидро бештар кардааст.

Исроил аз он нигарон аст, ки Барномаи мушакии Эрон ба андозаи барномаи атомии он таҳдиди ҷиддӣ ба ҳисоб меравад. Гузоришҳо дар бораи эҳтимоли тавофуқи эҳтимолӣ миёни Эрон ва Амрико, ки фақат ба Барномаи атомӣ бояд вобаста бошад ва маҳдудиятеро барои тавонмандиҳои мушакии Эрон пешбинӣ накунад, нигарониҳои амиқи мақомоти амниятии Исроилро ба миён овардааст.

Ба асоси иттилооти низомӣ Эрон баъд аз ҳар марҳилаи рӯёрӯи бо Исроил дар моҳҳои апрел, октябр ва июни соли ҷорӣ шеваҳои амалиётии худро таҷдид ва тавонмандиҳои убур аз системаҳои дифои ҳавоии Исроилро таҳким бахшидааст.

Фарқияти мушакҳои худсохти Эрон ва ракетаҳое, ки аз ҷониби гурӯҳҳои ноиби он, чун Ҳизбуллоҳ ва Ҳусиҳо партоб мешаванд, хеле зиёд аст. Мушакҳои Эрон дорои масофаи парвози зиёд, вазни зиёдтар ва қудрати тахрибии бештар буда, мустақиман зерсохтҳои ҳаётии Исроилро ҳадаф мегиранд.

Бар асоси гузоришҳо захираҳои мушакии Ҷумҳурии Исломӣ на фақат дар паноҳгоҳҳои зеризаминӣ, балки дар минтақаҳои кӯҳистонии кишвар низ пароканда шудааст, ки шиносоии онҳоро барои душман хеле душвор мегардонад.

Dialog.tj