Рустами Эмомалӣ, раиси Маҷлиси миллии Маҷлиси Олии Ҷумҳурии Тоҷикистон ва раиси шаҳри Душанбе рӯзи 21 –уми май дар шаҳри Ню-Йорки Иёлоти Муттаҳидаи Амрико бо Дабири кулли Созмони Милали Муттаҳид Антонио Гуттериш мулоқот намуд.

Дар ҷараёни мулоқоти дуҷониба масъалаҳои ҳамкорӣ миёни Тоҷикистон ва Созмони Милали Муттаҳид мавриди баррасӣ қарор гирифт.

Раиси шаҳри Душанбе Рустами Эмомалӣ дар ҷараёни мулоқот таъкид намуд, ки  ба рушди муносибатҳо бо Созмони Милали Муттаҳид аҳамияти хос медиҳад ва ин ниҳодро яке аз шарикони асосӣ дар арсаи ҷаҳонӣ  мешуморад.

Ҳамчунин, Рустами Эмомалӣ аз ҳолати ҳамкории рӯзафзуни Созмони Милал бо парламентҳои миллӣ изҳори қаноатмандӣ намуда, дар хусуси саҳми мақомоти қонунгузори мамлакат, аз ҷумла Маҷлиси миллӣ дар амалӣ намудани уҳдадориҳои байналмилалӣ, татбиқи вазифаҳои “Стратегияи миллии рушди Тоҷикистон барои даври то соли 2030”, ки  Рӯзномаи 2030 ва Ҳадафҳои рушди устувор ҳамоҳанг шудаанд, гуфтугӯ намуд.

Дар ҷараёни мулоқот ду ҷониб масъалаҳои ҳамкорӣ дар соҳаи об, тағйирёбии иқлим ва таъсири оқибатҳои он ба башарият, пешгирии офтаҳои табиӣ, ҳизфи пиряхҳоро баррасӣ намуданд. Дар хусуси аҳамияти Конфронси байналмилалии ҳизфи пиряхҳо, ки аз 29 то 31-уми май дар Ҷумҳурии Тоҷикистон доир мегардад, табодули андеша сурат гирифт.

Дар ҷараёни мулоқот ба нақши муҳимми Созмони Милали Муттаҳид доир ба масъалаҳои амниятӣ, ба вижа вокуниш ба хавфу таҳдидҳои физояндаи ҷаҳони муосир, аз ҷумла терроризму ифротгароӣ таваҷҷуҳ зоҳир гардид. Вобаста ба вазъи имрӯзаи Афғонистон таъкид шуд, ки Тоҷикистон ҳамеша ҷонибдори истиқрори сулҳ ва оромии комил ва рушди босуботи он аст ва талошҳои муштараки ҷомеаи ҷаҳонӣ ва Созмони Милалро дар роҳи барқарор намудани сулҳу субот пуштибонӣ мекунад.

Dialog.tj