Муовини бахши радиоии расонаҳои миллии Эрон эълон кард, ки бо таваҷҷуҳ ба забони муштарак Эрон омода аст, бо Тоҷикистон барномаҳои муштарак бо забони форсӣ таҳия кунад.

Расонаҳои Эрон хабар доданд, ки мулоқоти раиси Кумитаи телевизион ва радиои Ҷумҳурии Тоҷикистон Носир Саид бо Алӣ Бахшизода, муовини садои расонаи миллии Эрон, Маҳдӣ Озармакон, муовини аввали садо ва мудири радиои Эрон, Сайидмуртазо Козимии Динон, мудири радиои Фарҳанг, Маҳдӣ Шамлу, мудири Эронсадо доир гашт.

Дар ҷараёни мулоқоти дуҷониба Носир Саид, раиси Кумитаи телевизион ва радиои Ҷумҳурии Тоҷикистон аз пешниҳоди сохтани барномаҳои муштараки радиоӣ истиқбол кард ва гуфт, ки Тоҷикистон омодаи ҳамкорӣ дар ин бахш аст.

“Истеҳсоли барномаҳои муштарак метавонад як қадами муҳим барои баланд бардоштани сифати мундариҷаи расонаҳо бошад. Мо кӯшиш мекунем, ки пайвандҳои адабӣ, таърихӣ ва ғайраро ба воситаи истеҳсоли барномаҳои муштарак таҳким бахшем” – афзуд Носир Саид.

Алӣ Бахшизода, муовини садои расонаи миллии Эрон дар ҷараёни мулоқот бо Носир Саид бо зикри таҷрибаи хуби Эрон дар заминаи мустанадсозии радиоӣ гуфт: “Баргузории се соли пайиҳами ҷашнвораи Пайванд боиси рушди мустанадсозӣ дар радио шуд. Имсол чорумин давраи байналмилалии ин ҷашнвора баргузор мешавад ва мавзӯи бахши байналмилалии он “муқовимати исломӣ” интихоб ва ба истиқболи густурда рӯ ба рӯ гардид. Дар ин бахш асарҳои зиёд қабул шуданд, ки нишон медиҳад, ҷашнвораи Пайванд дар самти ҳадафҳои таърифшуда ҳаракат мекунад. Дар Эрон 99 шабакаи радиоӣ дорем, ки як қисми онҳо радиоҳои маҳаллиянд ва мардум бо ин шабакаҳо иртиботи хеле хуб доранд”.

Алӣ Бахшизода афзуд, назарсанҷиҳо нишон медиҳад, ки радио миёни мардум чун расонаи хос шинохта шудааст. Ӯ таъкид кард, ки бо ташаббус ва пуштибонии Паймон Раҷабӣ, раиси садо ва симои Ҷумҳурии Исломии Эрон шумораи шабакаҳои радиоӣ дар Эрон афзоиш ёфтааст.

Dialog.tj