Раиси Суди Олии Ҷумҳурии Тоҷикистон Мирзозода Рустам Пираҳмад дар ҳошияи Нишасти 20-уми роҳбарони низоми судии кишварҳои узви Созмони Ҳамкориҳои Шанхай бо раиси Суди Олии Ҷумҳурии Исломии Эрон Ғуломҳусейн Муҳсинӣ мулоқот намуда, масъалаҳои дуҷонибаи ҳамкорӣ миёни Душанбе ва Теҳронро баррасӣ кард.

Мирзозода Рустам дар суҳбат бо Ғуломҳусейн Муҳсинӣ гуфт, ки фарҳанги муштарак ва ҳамзабонӣ миёни ду кишвар – Эрон ва Тоҷикистон заминаи рушди ҳамкорӣ ва робитаҳоро фароҳам кардааст. Ӯ афзуд, ки нигоҳ ва роҳи ҳалҳои ду кишвар дар мавриди бисёре аз масъалаҳо яксон ва мушобеҳ аст.

Мирзозода Рустам бо ишора ба сафари ахири президенти Ҷумҳурии Исломии Эрон ба Тоҷикистон гуфт: “Як марҳилаи нави муносибатҳо ва муомилот миёни ду кишвари ҳамсоя оғоз гардидааст ва дар Тоҷикистон аз густариш ва рушди робитаҳо бо Ҷумҳурии Исломии Эрон дар бахшҳои гуногун истиқбол мекунем”.

Ғуломҳусейн Муҳсинӣ дар мулоқот бо Мирзозода Рустам гуфт, ки дар мубориза бо проблемаҳои минтақавӣ ва ҷаҳонӣ агар кишварҳои ҳамсоя ба ҳамкорӣ ва ёрии мутақобил даст наёбанд, хатари зарар дидан онҳоро таҳдид мекунад. Ӯ афзуд, ки ҳамкорӣ барои ҳамгироии минтақавӣ барои мубориза бо ин проблемаҳо як принсипи асосӣ аст.

“Эътиқоди мо бар он аст, ки барои мубориза бо проблемаҳои ҷаҳонӣ ва минтақавӣ зарур аст бо кишварҳои ҳамсоя, хусусан Тоҷикистон, ки умумиятҳои зиёди фарҳангӣ ва забонӣ дорем, ба ҳамкорӣ ва ҳамдигарфаҳмии бештар даст ёбем” – таъкид кард Ғуломҳусейн Муҳсинӣ.

Раиси Суди Олии Эрон гуфт, ки умумиятҳои мавҷуд ин зарфиятро доранд, ки назар ва дарки худро нисбат ба масъалаҳо ва падидаҳои ҷаҳонӣ, аз ҷумла мавзуъҳои ҳуқуқи башар ҳарчӣ бештар наздик созанд. Ӯ афзуд, ки Эрон назари Тоҷикистон дар мавриди масъалаҳои ҳуқуқи башарро арзишманд мешуморад.

“Зарфиятҳои ду кишвар – Эрон ва Тоҷикистон густариши муносибат ва ҳамкорирҳоро дар бахшҳои гуногун, аз ҷумла дар заминаи масъалаҳои ҳуқуқӣ ва судӣ талаб мекунад” – афзуд Ғуломҳусейн Муҳсинӣ.

Ӯ ҳамчунин, ба сафари ахири Масъуд Пизишкиён ба шаҳри Душанбе ишора намуда, гуфт, ки он ба рушди бештари муносибат ва ҳамкориҳои ду кишвар замина фароҳам мекунад.

“Ҳамаи ҷаҳониён, бахусус кишварҳои мусалмони минтақа дар муқобили ҷиноятҳои ваҳшиёнаи режими Исроил дар Ғазза масъулият доранд. Мо бояд аз зарфиятҳои маҷлисҳои минтақавӣ ва байналмилалӣ, мисли Созмони Ҳамкориҳои Шанхай барои андешидани иқдомҳои муассир дар муқобила бо ин ҷиноятҳои ваҳшиёна истифода барем” – гуфт Ғуломҳусейн Муҳсинӣ.

Мирзозода Рустам Пираҳмад барои ширкат дар нишасти 20-уми низоми судии кишварҳои узви Созмони Ҳамкориҳои Шанхай ба кишвари Чин сафар намуда, бо як қатор раисони судҳои олии кишварҳо мулоқот ва гуфтугӯ намуд.

Dialog.tj