Дар Истамбул – пойтахти Ҷумҳурии Туркия машваратҳои дуҷонибаи консулгарӣ миёни вазоратҳои корҳои хориҷии Ҷумҳурии Тоҷикистон ва Ҷумҳурии Туркия баргузор гардид. Дар ин хусус, дафтари матбуоти Вазорати корҳои хориҷии Ҷумҳурии Тоҷикистон хабар додааст.

Роҳбарии ҳайати Тоҷикистон дар ин гурӯҳро сардори Идораи асосии консулгарии Вазорати корҳои хориҷии Тоҷикистон Баҳодур Сафарзода ба уҳда дорад. Ҷониби Туркияро директори генералии масъалаҳои консулгарӣ ва муҳоҷирати Вазорати корҳои хориҷии Туркия Фатма Ҷерен Язган намояндагӣ мекунад.

Ду ҷониб дар ҷараёни музокирот доираи васеи масъалаҳои ҳамкориҳои дуҷонибаи консулгариро мавриди баррасӣ қарор доданд. Таваҷҷуҳи асосӣ ба сода намудани тартиби гирифтани раводид, таъмини ҳуқуқу манфиатҳои шаҳрвандон ва расонидани ёрии ҳуқуқи мутақобила равона гардид.

Вазорати корҳои хориҷии Тоҷикистон иттилоъ дод, ки ҷонибҳо омодагии худро барои таҳкими ҳамкориҳо дар соҳаи ҳуқуқӣ ва консулгарӣ тасдиқ намуданд ва хоҳиш карданд, ки муколамаи созанда дар хусуси масъалаҳои муҳимми сиёсати муҳоҷират ва раводидро идома диҳанд.

Дар фарҷоми машваратҳо ҷонибҳо барои нигоҳ доштани тамоси мунтазам бо ҳадафи ҳалли самараноки масъалаҳои пайдошаванда ва баланд бардоштани сатҳи ҳамкориҳо миёни ду кишвар ба мувофиқа расиданд.

Бар асоси иттилои расонаҳои туркӣ ҳайатҳои дипломатии ду кишвар дар мавриди бекор кардани низоми раводид миёни ду кишвар гуфтугӯ карданд.

Тоҷикистон ва Туркия қаблан низоми бидуни раводид доштанд. Аммо баъди рух додани чанд ҳодисаи террористӣ Туркия ба таври якҷониба тасмим гирифт, ки низоми бидуни раводид бо Тоҷикистонро лағв кунад.

Dialog.tj