Раиси Кумитаи гардишгарии палатаи савдои вилояти Қазвини Ҷумҳурии Исломии Эрон гуфт, ки ҷашни “Наврӯз вифоқи фаромарзӣ” бо ширкати меҳмонҳои вижа аз Ҷумҳурии Тоҷикистон баргузор хоҳад шуд.

Амир Мунсиф, раиси Кумитаи гардишгарии Палатаи савдои вилояти Қазвин дар суҳбат бо ИРНА гуфт, ҷашне таҳти унвони “Наврӯз вифоқи фаромарзӣ” бо ҳамкории Ҷумҳурии Тоҷикистон барои як рӯз бо мизбонии Қазвин баргузор мегардад.

Амир Мунсиф ёдовар шуд, баъди сафари ҳайати ҳукумати чордаҳум ба Ҷумҳурии Тоҷикистон 23 санади ҳамкорӣ имзо шуд, ки яке аз онҳо ба соҳаи сармоягузорӣ ва гардишгарӣ робита дошт.

Раиси Кумитаи гардишгарии палатаи савдои Эрон Амир Мунсиф таъкид кард, ки бо назардошти эълони ин санади ҳамкорӣ дар бахши сармоягузорӣ ва гардишгарӣ бо Ҷумҳурии Тоҷикистон, аз тарафи Вазорати корҳои дохилӣ ба мақомоти маҳаллӣ дастур дода шуд, ки вилояти Қазвин ба ҳайси вилояти пилотӣ дар ин самт фаъол гардад.

Ҷашни “Наврӯз вифоқи фаромарзӣ” ба воситаи Палатаи савдои Қазвин ва бо ҳамкории бархе ниҳодҳои дахлдори ин вилоят баргузор мешавад ва тамошои он барои тамоми мардум озод хоҳад буд.

Dialog.tj