Масъули сиёсати хориҷии Иттиҳоди Аврупо Кая Каллас гуфт, ки қатъ шудани маблағгузории Радиои Аврупои озод - Радиои озодӣ аз сӯйи Иёлоти Муттаҳидаи Амрико бисёр “нохушоянд” аст, аммо Иттиҳоди Аврупо наметавонад ба таври худкор ҷойгузини Амрико шуда, маблағгузории ин расонаро бар уҳда гирад.

Кая Каллас рӯзи 17-уми март дар суҳбат бо хабарнигорон дар Брюссел гуфт: “Радиои Аврупои озод ҳамеша чароғе барои демократия буд ва арзиши бузург дорад”.

Крис Лик, мушовири калони Созмони расонаҳои ҷаҳонии Амрико дирӯз дар номае ба унвони Радиои Озодӣ хабар дод, ки маблағгузории ин расона қатъ шудааст.

Қатъи маблағгузории Радиои озодӣ аз рӯзи нашр шудани қарор ба иҷро даромад ва агар ин расона хостори ба чолиш кашидани ин қарор бошад, метавонад дар давоми 30 рӯз дархости бозбинии онро пешниҳод кунад.

Масъули сиёсати хориҷии Иттиҳоди Аврупо дар идома гуфт, ки масъалаи қатъи маблағгузории Радиои озодӣ дар маҷлиси вазирони корҳои хориҷии ин Иттиҳод баррасӣ хоҳад шуд. Ӯ гуфт: “Хабари он ки Иёлоти Муттаҳидаи Амрико маблағгузории ин расонаро қатъ кардааст, хеле нохушоянд аст”.

Кая Каллас, ки қаблан сарвазири Эстония буд, таъкид кард: “Акнун барои мо суол пеш меояд, оё метавонем бо маблағгузорӣ ин камбудро ҷуброн кунем? Посух ин аст, ки ба таври худкор, не”.

Ӯ таъкид кард, ки Иттиҳоди Аврупо имкониятҳои амалии эҳтимолӣ дар ин заминаро баррасӣ хоҳад кард.

Чанд соат қабл аз ин изҳорот Ян Липавский, вазири корҳои хориҷии Ҷумҳурии Чех гуфт, ки масъалаи Радиои озодиро дар маҷлиси вазирони корҳои хориҷии Иттиҳоди Аврупо дар Брюссел баррасӣ мекунад.

Ян Липавский илова кард, ки кӯшиш хоҳад кард, пуштибонии Иттиҳоди Аврупоро барои идомаи фаъолияти Радиои озодӣ дар Прага ба даст оварад ва аз ин Иттиҳод хоҳиш намуд, ки роҳҳои ҳифзи ҳадди ақали пахши расонаро баррасӣ намояд.

Доналд Трамп, президенти Иёлоти Муттаҳидаи Амрико бо як фармони иҷроӣ талаб намуд, ки фаъолияти ҳафт ниҳоди федералӣ, аз ҷумла Агентии нозири “Садои Амрико” ва дигар расонаҳои давлатӣ ба ҳадди аксар коҳиш дода шавад.

Ҳукумати Амрико тибқи ҳамин фармон кормандони расонаҳои зердасташ, аз ҷумла “Садои Амрико” –ро то замони огоҳии минбаъда ба рухсатӣ фиристод.

Кумитаи дифоъ аз рӯзноманигорон аз роҳбарони Конгресси ИМА даъват кардааст, ки аз созмони расонаҳои ҷаҳонии Амрико дар баробари фармони Доналд Трамп ҳимоят кунанд.

Dialog.tj