Ширкати ҳавопаймоии “Kish Airlines”-и Ҷумҳурии Исломии Эрон парвозҳои мустақим миёни шаҳри Душанбе ва ҷазираи Киши Эронро бо мақсади рушди сайёҳӣ ва ҷалби бештари сайёҳони хориҷӣ дар давраи ҷашни Наврӯз оғоз мекунад.

Гуфта мешавад, ки ин парвозҳои махсус бахшида ба ҷашни Наврӯз бо ҳавопаймои Airbus А321 аз 16 ё 18-уми марти соли ҷорӣ анҷом дода мешавад.

Агентии авиатсияи граждании назди Ҳукумати Ҷумҳурии Тоҷикистон хабар медиҳад, ки дар рӯзҳои таҷлили ҷашни Наврӯз се парвози мустақим ба роҳ монда мешаванд. Аммо маълум нест, ки ин парвозҳои махсус миёни шаҳри Душанбе ва ҷазираи Киши Эрон ба таври доимӣ аст ё фақат дар ҷашни Наврӯз ба роҳ монда мешавад.

Ҷазираи Киш дар соҳили Халиҷи Форс ҷойгир аст. Дар он марказҳои савдои муосир ва навъҳои гуногуни фароғати обӣ, аз ҷумла дайвинг, лижаронии обӣ ва киштӣ ҷойгир мебошанд. Ин ҷазира яке аз машҳуртарин маконҳои сайёҳии Эрон ба шумор меравад. Ҷазираи Киш ба далели оби гарм ва регзору дар наздикии соҳили Халиҷи Форс ҷойгир будан, мавриди таваҷҷуҳи сайёҳон қарор гирифтааст. Мақомоти Эрон гуфтаанд, ки бо мақсади рушди додани сайёҳӣ аз ҳама имкониятҳо истифода хоҳанд кард.

Dialog.tj