Имрӯз, 27-уми феврал раиси Кумитаи давлатии амнияти миллии Қирғизистон Қамчибек Ташиев дар парлумони ин кишвар ҷузъиёти созишномаҳои сарҳадиро шарҳ дод. Муҳимтарин масъала дар баҳси музокироти марзӣ минтақаи Ворухи Тоҷикистон буд.

Расонаҳои Қирғизистон ба нақл аз Қамчибек Ташиев навиштанд, ки чӣ гуна масъалаи Ворух дар музокирот бо мақомоти Тоҷикистон ҳал шуд.

Қамчибек Ташиев шаҳр дод, ки қаблан сокинони минтақаи Ворух 19 ҳазор гектар заминро истифода мекарданд. Ӯ таъкид кард, ки пас аз гуфтушунидҳо 14, 4 ҳазор гектар заминро дар ихтиёри худ нигаҳ доштанд.

“Яъне, онҳо қаблан замини бештарро истифода карда аз сарҳад мегузаштанд. Ин ба шаҳрвандони мо имкон намедод, ки аз он минтақа гузаранд. Ба дархости ҷониби Тоҷикистон 1 ҳазор гектар чарогоҳ, дар наздикии Ворух ба онҳо дода шуд. Дар иваз мо низ ҳамин миқдор чарогоҳ дар минтақаи Қарағанда-Сой дар ноҳияи Чон-Алай гирифтем”  - шарҳ дод Қамчибек Ташиев.

Ӯ гуфт, ки ҷониби Тоҷикистон мехост 5 ҳазор гектар замин гирад, зеро шумораи аҳолии Ворух меафзояд ва баъди муайян шудани сарҳади давлатӣ онҳо дигар наметавонанд, мисли гузашта ба ҳудуди мо ворид шаванд.

“Мо розӣ нашудем, зеро дар он сурат Ворух хеле бузург мешуд” – гуфт Қамчибек Ташиев.

Як минтақаи Қирғизистон ба ҳайси анклав дар дохили Тоҷикистон буд, ки он бо иваз намудани замин роҳи ҳал пайдо кард. Қамчибек Ташиев гуфт, минтақаи анклави Қайрағаш, ки қаблан ба Тоҷикистон тааллуқ дошт, пурра ба ихтиёри Қирғизистон гузашт.

Рӯзи гузашта Қамчибек Ташиев дар вилояти Бонканд гуфт, ки раванди ба расмият даровардани ҳуҷҷатҳо як моҳро дар бар мегирад. Баъди имзои сарони ду кишвар ва парлумонҳо эътибори ҳуқуқӣ мегирад.

Dialog.tj