Муҳаммадризо Ориф, муовини президенти Ҷумҳурии Исломии Эрон дар маҷмуаи таърихии “Саъдобод”-и Теҳрон аз сарвазири Ҷумҳурии Тоҷикистон Қоҳир Расулзода истиқбол намуда, таъкид кард, дидори дуҷониба ва ширкат дар ҳамоиши иқтисодии кишварҳои ҳошияи Хазар ду ҳадафи асосии сафари нахуствазири Тоҷикистон ба Эрон аст.

Муовини президенти Эрон таъкид кард, ки равобити сиёсии Тоҷикистон ва Эрон дар беҳтарин шароит қарор дорад. Ӯ ишора намуд, ки сафари Масъуд Пизишкиён ба шаҳри Душанбе баёдмонданӣ буд ва меҳмоннавозии бисёр арзишманди ҳукумати Тоҷикистон стратегияи ҳамаҷонибаи рушди ҳамкориҳоро нишон медиҳад.

“Имрӯз дар идомаи стратегияҳои мавриди назар бо нахуствазири Тоҷикистон вориди баҳсҳои амалӣ шудем ва хулосаамон ин буд, ки хушбахтона, иқтисоди ду кишвар метавонад такмилдиҳандаи ҳамдигар бошад. Мо метавонем дар бахшҳои мухталиф ниёзҳои Тоҷикистонро таъмин кунем” – таъкид кард Муҳаммадризо Ориф.

Муовини президенти Эрон дар нишасти хабарии муштарак бо сарвазири Тоҷикистон гуфт, ки бояд бахши хусусӣ фаъол шавад ва ҳукуматҳои ду кишвар барои осон намудани равобити дуҷонибаи бахшҳои хусусӣ иқдомҳои лозимро анҷом дищанд. Ӯ ба бекор шудани низоми раводид миёни Тоҷикистон ва Эрон ишора намуда, афзуд, ки он заминаро барои ҳамкориҳо дар бахшҳои мухталиф фароҳам мекунад.

“Талош хоҳем кард, бо осон намудан заминаро барои зуҳури бахши хусусии ду давлат, бахусус дар бахшҳои хизматрасонии техникӣ ва муҳандисие, ки бо бунгоҳҳо ва ширкатҳои хос, ки дар минтақа низ ҳузури фаъол доранд ва фаъолияти онҳо мавриди ризояти корфармоён аст, фароҳам кунем. Бо ин асос ҳамкориҳои худро бо кишвари Тоҷикистон идома медиҳем” – таъкид кард Муҳаммадризо Ориф.

Муовини президенти Эрон хабар дод, ки нахуствазири Тоҷикистон Қоҳир Расулзода дар рӯзи оянда бо ҷамъе аз вазирони эронӣ нишасти муштарак хоҳад дошт ва дар ин нишаст масъалаи ҳамкориҳои дуҷониба дар бахшҳои гуногун мавриди баррасӣ қарор хоҳад гирифт.

Қоҳир Расулзода, сарвазири Ҷумҳурии Тоҷикистон дар ин нишаст таъкид кард, ки Тоҷикистон таваҷҷуҳи хоси Ҷумҳурии Исломии Эрон нисбат ба Тоҷикистонро арҷ мегузорад. “Музокироти имрӯза дар фазои дӯстона ва бо эътимод ба ҳамдигар сурат гирифт”.

Сарвазири Тоҷикистон бо ишора ба сафари Масъуд Пизишкиён, президенти Ҷумҳурии Исломии Эрон гуфт, мо ҷонибдории худро аз ҳамкории ду давлат дар заминаҳои мухталиф эълон кардем: “Итминон дорам, ки санадҳои имзошудаи миёни ду кишвар заминаи мусоидро барои ҳамкориҳои дуҷониба фароҳам мекунад”.

Dialog.tj