Вазирони хориҷии Ҷумҳурии Тоҷикистон ва Ҷумҳурии Қазоқистон дар оянда созишнома дар соҳаи ҳамкориҳои энергетикиро имзо хаҳанд кард. Дар ин хусус, Сироҷиддин Муҳриддин, вазири корҳои хориҷии Тоҷикистон зимни гуфтушунид бо Мурат Нуртлеу, муовини сарвазири Ҷумҳурии Қазоқистон дар шаҳри Остона ба тавофуқ расиданд.

Тибқи иттилои расонаҳо созишномаи зикршуда масъалаи интиқол ва таъмини барқи истеҳсолшудаи аз неругоҳи барқӣ-обии Роғунро дар бар мегирад.

Вазири корҳои хориҷии Тоҷикистон Сироҷиддин Муҳриддин таъкид намуд, ки ҳамкориҳои иқтисодӣ ва тиҷоратӣ яке аз самтҳои афзалиятноки ҳамкориҳои дуҷониба миёни ду кишвар аст.

Сироҷиддин Муҳриддин дар нишасти матбуотӣ оид ба самтҳои асосии ҳамкориҳои иқтисодӣ ва тиҷоратӣ сухан намуда, афзуд, ки баррасии таъсиси корхонаи муштараки коркарди тухми офтобпараст, оғози фаъолияти Бонки фаръии Қазоқистон “Freedom Bank” дар Тоҷикистон, сохтани маркази логистикии муштарак барои кишоварзӣ ва содирот, таҳкими ҳамкориҳо дар соҳаи технологияҳои рақамӣ аз ҷумлаи самтҳои асосии ҳамкориҳои дуҷониба миёни Тоҷикистон ва Қазоқистон мебошад.

Тибқи иттилои мақомоти тоҷик ҳоло дар ҳудуди Тоҷикистон беш аз 100 ширкати қазоқистонӣ фаъолият менамоянд.

Dialog.tj