Вазири корҳои хориҷии Ҷумҳурии Тоҷикистон Сироҷиддин Муҳриддин бо даъвати Сергей Лавров ба  Федератсияи Русия сафар намуда, дар формати маҳдуд ва васеъ дурнамои ҳамкориҳои Тоҷикистону Русияро баррасӣ намуданд. Ҷонибҳо дар ин мулоқот масъалаи ҳамкориҳо дар соҳаҳои сиёсӣ, иқтисодӣ, гуманитарӣ ва масъалаҳои амнияти миллиро мавриди гуфтугӯ қарор доданд.

Вазирони корҳои хориҷии ду кишвар зимни баррасии масоили ҳамкориҳо ба амалӣ намудани созишномҳои дуҷониба таваҷҷуҳ зоҳир намуданд. Яке аз мавзуъҳои асосии мулоқоти дуҷониба ҳамкорӣ дар бахши муҳоҷират буд. Вазирони ду кишвар ба ҳифзи ҳуқуқ ва озодиҳои муҳоҷирони тоҷик, ки дар Русия кор мекунанд, таъкид карданд. Онҳо чораандешӣ ва ҳифзи ҳуқуқҳои шаҳрвандони Тоҷикистон дар Федератсияи Русияро махсус таъкид намуданд.

Сергей Лавров, вазири корҳои хориҷии Федератсияи Русия таъкид кард, ки дар замони мараккаби геополитикӣ муносибатҳои ду кишвар устуворона рушд мекунанд. Ӯ бо зикри ин ки Тоҷикистон ва Русияи иттифоқчиёни санҷидашудаи вақт мебошанд ва ба ҳамкориҳои гуногунҷанба такя мекунанд, гуфт: “Муносибатҳо бо субот рушд мекунанд, ҳатто дар шароити имрӯз, ки агар ба таври мулоим гӯем, душвор аст”.

Вазири корҳои хориҷии Федератсияи Русия Сергей Лавров аз пуштибонии Тоҷикистон аз лоиҳаҳо ва ташаббусҳо барои густариши таҳсилоти русзабон дар Тоҷикисон сипосгузорӣ намуда, афзуд: “Бо дархости дӯстони тоҷикистонӣ барои соли хониши ҷорӣ миқдори квотаҳои ҳукуматиро то 1000 ҷой афзоиш додем. Ин яке аз нишондиҳандаҳои баландтарин дар муносиботи мо бо кишварҳои хориҷӣ дар ин соҳа мебошад”.

Сергей Лавров таъкид кард, ки бар асоси супориши президентҳои ду кишвар созишномаи байниҳукуматӣ оид ба сохтмони марказ барои кӯдакони болаёқат дар шаҳри Душанбе ва бинои нави Театри драмаи русии ба номи Маяковский ба имзо расид. Ӯ афзуд, ки ба наздикӣ бунёди ҳар ду бино оғоз хоҳад шуд.

“Мо аз дастгирии Шумо дар авлавияти раёсати Русия дар Иттиҳоди давлатҳои мустақил дар соли гузашта қадр мекунем. Мо аз афзалиятҳои шумо пуштибонӣ мекунем ва бовар дорем, ки раёсати шумо муваффақ хоҳад буд” – зикр кард Сергей Лавров.

Сироҷиддин Муҳриддин дар суҳбат бо Сергей Лавров масъалаи ҳуқуқи муҳоҷирони Тоҷикистонро баррасӣ намуда, дар хусуси ширкат намудани Пешвои миллат муҳтарам Эмомалӣ Раҳмон дар ҷашн  80-солаги Ғалаба чунин гуфт: “Мо бо худ паёми ҷавобии президенти Тоҷикистонро ба президенти Русия овардем, ки дар он тасдиқ шудааст, муҳтарам Эмомалӣ Раҳмон дар маросимҳои ҷашн бахшида ба 80 – солагии Ғалаба - 9 –уми май дар Москва иштирок мекунанд”.

Dialog.tj